बर्दिबासको बारमा मुख्यमन्त्रीको शपथ: उपेन्द्र यादवले भने, “गणतन्त्रकै उपहास”

जनकपुरधाम — मधेस प्रदेशमा मध्यरातमा नयाँ मुख्यमन्त्री नियुक्ति र शपथसमेत गराइएपछि यसले राजनीतिक माहोलमा व्यापक तरङ्ग पैदा गरेको छ। यस घटनाले प्रदेशको राजधानी जनकपुरधाम बाहिर, बर्दिबासको एक होटेलमा भएको अनौपचारिक र अपारदर्शी अभ्यासलाई लिएर विभिन्न राजनीतिक दलहरू र नेताहरूबीच तीव्र आलोचनाको आगो बलिरहेको छ। यस घटनालाई लिएर जनता र राजनीतिक विश्लेषकहरूबीच गम्भीर प्रतिक्रिया व्यक्त भइरहेको छ।

रातोपाटीसँग गरिएको विशेष कुराकानीमा जसपा नेपालका अध्यक्ष उपेन्द्र यादवले यस घटनालाई अत्यन्तै हाँस्यास्पद र दुर्भाग्यपूर्ण भन्दै यसलाई लोकतन्त्र र गणतन्त्रको उपहास भने। उनले भने, “मधेसमा मध्यरातमा मुख्यमन्त्री नियुक्ति र शपथ गराउने यो घटना संसारमा कहीँ नभएको अनौठो र हाँस्यास्पद शैली हो। यसले लोकतन्त्रको मर्म र संविधानको अवहेलना गरेको छ।”

उपेन्द्र यादवले यस घटनाको जिम्मेवारी नेकपा एमालेमाथि टेकेर भने, “यो सबैको जिम्मा एमालेको हो। उनीहरूले अझै पनि चेतना नदेखाएको र आफ्नो स्वार्थसहित यस्तो अनैतिक कदम चालिरहेको छन्। यो सम्पूर्ण योजनाकार र जिम्मेवार एमाले नै हो।” उनले थपे, “हामी अब यस विरुद्ध सकृय रूपमा उभिनेछौं र राजनीतिक, कानुनी र संसदीय संघर्षको बाटो चाल्नेछौं।”

उनले आगामी कदमबारे बताए, “हामीले यो अलोकतान्त्रिक र असंवैधानिक कदमको विरुद्धमा आवाज उठाउँदै, जनतालाई साथ लिएर यसको पर्दाफास गर्नेछौँ। पारदर्शिता र सही प्रक्रियामार्फतै नेतृत्व परिवर्तन हुनुपर्छ।”

साथै, उनले एमालेबाहेक अन्य दलहरूसँग मिलेर नयाँ सरकार निर्माणको सम्भावनालाई पनि संकेत गरे। “हामी अन्य राजनीतिक दलहरूसँग छलफल गरिरहेका छौँ र एमालेबाहेकको सरकार बन्न सम्भव छ। यसतर्फ हाम्रो प्रयास जारी छ।”

प्रदेश प्रमुखको भूमिका र उनीसँग सम्बन्धित विवादबारे उनले भने, “प्रदेश प्रमुखले राजीनामा दिनुपर्छ र यदि आवश्यक भए बर्खास्त गर्नुपर्छ। उहाँले यस्तो गैरजिम्मेवार र अनुशासनहीन काम गर्न मिल्दैन।”

उनले थपे, “संवैधानिक पदमा बसेको व्यक्तिले यस्तो गैरजिम्मेवार कदम चाल्न सक्दैन। राति, होटेलको बारमा लुकेर यस्तो गर्नुभएकोले उहाँको नियत र प्रक्रिया गलत भएको स्पष्ट हुन्छ।”

मधेसको राजनीतिक भविष्यप्रति प्रतिक्रिया दिँदै उनले भने, “मधेसको राजनीति लोकतान्त्रिक विधि र प्रक्रियामार्फतै अघि बढ्नेछ। हामी आफ्ना अधिकारका लागि लड्नेछौं। यस घटनाले प्रणालीलाई कमजोर बनाउने प्रयास भए पनि हामी सही मार्गमा ल्याउनेछौं।”

अहिलेको मुख्य प्राथमिकता भनेको विधि, प्रक्रिया र संवैधानिक प्रश्नलाई सम्बोधन गर्नु हो। उपेन्द्र यादवले भने, “मुख्यमन्त्री को बन्ने भन्ने कुरा गौण हो। अहिलेको मुख्य प्राथमिकता भनेको यस्तो अनैतिक र अवैध कदमलाई सच्याउनु हो। हाम्रो संघर्ष पदका लागि होइन, पद्धतिका लागि हो।”