वीरगञ्जमा सशस्त्र प्रहरीको छापा, व्यापारीसँग झडप र सामान जप्त – ३ प्रहरी घाइते

वीरगञ्ज – वीरगञ्ज महानगरपालिका–१० आदर्शनगरमा रहेको एक गोदाममा सशस्त्र प्रहरी बल नेपाल र वीरगञ्ज भन्सार कार्यालयको संयुक्त टोलीले छापा हानेको छ। राजस्व चोरीको सूचनापछि गरिएको यस छापामारीका क्रममा व्यापारी र सुरक्षाकर्मीबीच झडप भएको हो।

सशस्त्र प्रहरीले विशेष सूचनाका आधारमा प्रमोद कुमार कानुले सञ्चालन गरेको ‘बबिता इन्टरप्राइजेज’ नामक गोदाममा पुगेर जाँच सुरु गरेको थियो। जाँचको क्रममा व्यापारीहरूले सामानको बिलबिजक रहेको दाबी गर्दै विरोध जनाए। उनीहरूले आफूहरूसँग सामानको स्पष्ट बिल भएको र आफूहरूलाई अनावश्यक दुःख दिइएको आरोप लगाए। बिल देखाएको भए पनि प्रहरीले सामान नियन्त्रण गर्न खोज्दा तनाव उत्पन्न भएको व्यापारीहरूको भनाइ छ।

आक्रोशित व्यापारीहरूले सशस्त्र प्रहरीमाथि ढुङ्गामुढा गरेपछि अवस्था तनावपूर्ण बनेको हो। यस क्रममा प्रहरीले फायरिङ्ग गर्दा केही ढुङ्गा प्रहार भएका थिए र सशस्त्र प्रहरीले प्रयोग गरेको गाडीको अगाडि सिसा फुटेको पनि खबर छ। झडपका क्रममा तीन जना सशस्त्र प्रहरी कर्मचारी सामान्य चोट लागेको जानकारी दिइएको छ।

छापामारीको क्रममा प्रहरीले गोदामबाट ५ पोका साडी, कुर्ता–सुरुवाल लगायतका कपडाका सामग्री नियन्त्रणमा लिएको छ। यी सामग्रीको मूल्य करिब ५ लाख रुपैयाँ रहेको भएपनि सामानको विस्तृत विवरण र यकिन परिमाण भने हालसम्म सार्वजनिक गरिएको छैन। अहिले सामानको लगत संकलन र मुचुल्का उठाउने कार्य जारी रहेको छ।

गोदामको स्वामित्व र सामानको वैधता जाँच गर्न थप अनुसन्धान भइरहेको नायव उपरीक्षक विकास अधिकारीले बताए। घटनापछि क्षेत्रमा सुरक्षा व्यवस्था कडा पारिएको छ र प्रहरीले थप कदमहरू चालिरहेको छ। यस घटनाले सीमा सुरक्षा र राजस्व चुहावट विरुद्धको अभियानलाई थप तीव्र बनाएको छ।