दुई हेलिकप्टर जुधेको घटना छानबिन समिति गठन

काठमाडौं । सोलुखुम्बुको फेरिचेमा मंगलबार दुई हेलिकप्टर ठोक्किँदा एक जनाको मृत्यु भएको छ भने दुई पाइलट र एक यात्रु घाइते भएका छन्।

घटनाको छानबिन गर्न नेपाल नागरिक उड्डयन प्राधिकरणले पाँच सदस्यीय समिति गठन गरेको छ। दुर्घटनामा एयर डाइनेस्टीको ‘९एन–एओडी’ र फिस्टेल एयरको ‘९एन–एजेआर’ दर्ता नम्बरका हेलिकप्टर आपसमा ठोक्किएका थिए।

प्राधिकरणका निर्देशक प्रभाकरचन्द्र मल्लिकको संयोजकत्वमा गठित समितिमा पाइलट तथा वायुयान इन्जिनियरसमेत छन्। समितिलाई दुर्घटनाको कारण र त्यसमा संलग्न कारक तत्त्व अध्ययन तथा विश्लेषण गरी प्रतिवेदन पेस गर्ने जिम्मेवारी दिइएको छ।

साथै, भविष्यमा यस्ता दुर्घटना दोहोरिन नदिन आवश्यक सुझाव दिन पनि समितिलाई कार्यादेश दिइएको प्राधिकरणले जनाएको छ।