नेपाल–भारत क्रस बोर्डर टुरिजम कनेक्ट २०२६ चितवनमा आयोजना हुने

चितवन । नेपाल–भारत पर्यटन साझेदारी विस्तार गर्ने उद्देश्यले कात्तिक ९ देखि ११ गतेसम्म चितवनमा ‘नेपाल–भारत क्रस बोर्डर टुरिजम कनेक्ट २०२६’ आयोजना हुने भएको छ। गैरआवासीय नेपाली संघ (एनआरएनए) अन्तर्राष्ट्रिय समन्वय परिषद् (आइसिसी) र समृद्ध चितवन अभियानले संयुक्त रूपमा कार्यक्रम आयोजना गर्न लागेका हुन्।

कार्यक्रमका संयोजक तथा एनआरएनए आइसिसीका प्रवक्ता सोमनाथ सापकोटाका अनुसार ‘सीमा जोड्दै, मित्रता बढाउँदै, पर्यटन प्रवर्द्धन गर्दै’ भन्ने नारासहित कार्यक्रम आयोजना हुनेछ। भारतीय बजारमा नेपालको प्रभावकारी प्रवर्द्धन गर्ने, नेपाली र भारतीय पर्यटन व्यवसायीबीच प्रत्यक्ष व्यावसायिक सम्बन्ध स्थापित गर्ने तथा नेपाली गन्तव्यलाई अन्तर्राष्ट्रिय पर्यटन सञ्जालसँग जोड्ने कार्यक्रमको मुख्य उद्देश्य रहेको उनले बताए।

“नेपालको पर्यटन प्रवर्द्धन प्रचार सामग्री वितरणमा मात्र सीमित हुनुहुँदैन। भारतीय पर्यटन व्यवसायीलाई नेपाली गन्तव्यमा प्रत्यक्ष अवलोकन गराउने, होटल तथा रिसोर्ट सञ्चालकसँग भेटघाट गराउने र सेवा–सुविधाबारे जानकारी दिँदै व्यावसायिक साझेदारीका आधार तयार गर्नु आवश्यक छ,” सापकोटाले भने।

उनका अनुसार भारतका विभिन्न सहरबाट २१ जना पर्यटन व्यवसायी तथा प्रतिनिधि कार्यक्रममा सहभागी हुनेछन्। उनीहरूले नेपाली पर्यटन व्यवसायी, होटल तथा रिसोर्ट सञ्चालक र स्थानीय पर्यटन सरोकारवालासँग भेटघाट तथा व्यावसायिक छलफल गर्नेछन्। कार्यक्रममा परिचयात्मक भ्रमण, पर्यटन प्याकेज निर्माण र भविष्यमा नियमित पर्यटक आवागमन बढाउने सम्भावनाबारे पनि छलफल हुनेछ।

भारतीय पर्यटकलाई नेपालका धार्मिक, आध्यात्मिक, सांस्कृतिक, प्राकृतिक, वन्यजन्तु तथा साहसिक पर्यटन गन्तव्यसँग जोड्न सके पर्यटन क्षेत्रमा ठूलो सम्भावना सिर्जना हुने सापकोटाको भनाइ छ।

कार्यक्रमले लुम्बिनी, रामग्राम, देवघाट, नवलपुर र चितवनलाई एउटै पर्यटन सर्किटमा जोड्ने लक्ष्य राखेको छ। भरतपुर महानगरपालिका, कपिलवस्तु नगरपालिका, लुम्बिनी सांस्कृतिक नगरपालिका, तिलोत्तमा नगरपालिका, देवदह नगरपालिका र रामग्राम नगरपालिकालगायत क्षेत्रलाई पर्यटन सञ्जालमा समेटेर क्षेत्रीय सहकार्य विस्तार गर्न सकिने उनले बताए।