विदेशी मुद्रा सञ्चिति ४० खर्ब ६५ अर्ब, २०.९ महिनाको आयात धान्ने

काठमाडौं । चालु आर्थिक वर्ष २०८३/८४ को भदौ मसान्तसम्म नेपालको कुल विदेशी विनिमय सञ्चिति ४० खर्ब ६५ अर्ब ७८ करोड रुपैयाँ पुगेको छ। यो सञ्चिति २०.९ महिनाको वस्तु आयात र १७.८ महिनाको वस्तु तथा सेवा आयात धान्न पर्याप्त रहेको नेपाल राष्ट्र बैंकले जनाएको छ।

राष्ट्र बैंकका अनुसार २०८३ असार मसान्तमा कुल विदेशी विनिमय सञ्चिति ३८ खर्ब ९७ अर्ब ६७ करोड रुपैयाँ थियो। भदौ मसान्तसम्म आइपुग्दा सञ्चिति ४.३ प्रतिशतले बढेको हो। अमेरिकी डलरमा गणना गर्दा सञ्चिति असार मसान्तको २५ अर्ब ३१ करोडबाट ४.६ प्रतिशतले वृद्धि भई भदौ मसान्तमा २६ अर्ब ४८ करोड पुगेको छ।

कुल सञ्चितिमध्ये नेपाल राष्ट्र बैंकमा रहेको विदेशी विनिमय सञ्चिति ४ प्रतिशतले बढेर ३६ खर्ब १० अर्ब ७६ करोड रुपैयाँ पुगेको छ। असार मसान्तमा यो रकम ३४ खर्ब ७३ अर्ब १९ करोड रुपैयाँ थियो।

त्यस्तै, बैंक तथा वित्तीय संस्थासँग रहेको सञ्चिति ७.२ प्रतिशतले वृद्धि भई ४ खर्ब ५५ अर्ब १ करोड रुपैयाँ पुगेको छ। असार मसान्तमा यस्तो सञ्चिति ४ खर्ब २४ अर्ब ४८ करोड रुपैयाँ थियो। भदौ मसान्तको कुल विदेशी विनिमय सञ्चितिमा भारतीय मुद्राको हिस्सा २१.३ प्रतिशत रहेको छ।

राष्ट्र बैंकका अनुसार भदौ मसान्तमा विदेशी विनिमय सञ्चिति कुल गार्हस्थ्य उत्पादनको ६१.६ प्रतिशत, कुल आयातको १४८.५ प्रतिशत र विस्तृत मुद्राप्रदायको ४४.९ प्रतिशत बराबर छ। असार मसान्तमा यी अनुपात क्रमशः ५९.१ प्रतिशत, १६३.४ प्रतिशत र ४३.८ प्रतिशत थिए।