स्वीकृत दरभन्दा बढी हवाई भाडा लिए १५ लाखसम्म जरिबाना प्रस्ताव

काठमाडौं । चाडपर्व, विपद् वा अन्य आपत्कालीन समयमा यात्रुबाट स्वीकृत दरभन्दा बढी हवाई भाडा असुल्ने वायुसेवा कम्पनीलाई १५ लाख रुपैयाँसम्म जरिबाना गर्ने प्रस्ताव गरिएको छ।

सङ्घीय संसद्‌मा पेस भएको नेपाल नागरिक उड्डयन प्राधिकरणसम्बन्धी कानूनलाई संशोधन र एकीकरण गर्न बनेको विधेयक, २०८३ मा यस्तो व्यवस्था राखिएको हो। विधेयकको दफा ४७ को खण्ड (ड) अनुसार, प्राधिकरणले स्वीकृत गरेको दरभन्दा बढी भाडा लिएर उडान सञ्चालन गर्नु कसुर मानिनेछ।

त्यस्तो कसुर प्रमाणित भएमा दफा ४८ को उपदफा (१) को खण्ड (ख) बमोजिम वायुसेवा सञ्चालक वा सम्बन्धित व्यक्तिलाई महानिर्देशकले ५ लाखदेखि १५ लाख रुपैयाँसम्म जरिबाना गर्न सक्ने प्रस्ताव छ। एकपटक सजाय पाएपछि पनि सोही कसुर दोहोर्‍याएमा पहिलेको भन्दा दोब्बर जरिबाना हुने व्यवस्था विधेयकमा गरिएको छ।

प्रस्तावित व्यवस्था लागू भएमा चाडपर्व, खराब मौसम वा विपद्का समयमा हवाई टिकटको मूल्य मनपरी बढाउने प्रवृत्ति नियन्त्रण हुने र यात्रुलाई राहत पुग्ने अपेक्षा गरिएको छ। यो व्यवस्था विधेयक पारित भएर ऐनका रूपमा लागू भएपछि मात्र कार्यान्वयनमा आउनेछ।