सुस्तामा नारायणीको बाढी: १६५ घर डुबानमा, बस्ती उच्च जोखिममा

बुटवल । पश्चिम नवलपरासीको सुस्ता गाउँपालिका–५ मा नारायणी नदीको बाढी पस्दा १६५ घर डुबानमा परेका छन्। नदीको जलस्तर बढिरहेकाले सुस्ताका सबै बस्ती जोखिममा रहेको स्थानीयले बताएका छन्।

शुक्रबारदेखि थारू टोलमा पस्न थालेको बाढीले त्यहाँका ७८ घरपरिवार प्रभावित भएपछि उनीहरूलाई सुस्तामै रहेको होल्डिङ सेन्टरमा सारिएको सशस्त्र प्रहरी बेस क्याम्प सुस्ताका प्रहरी उपरीक्षक गोविन्दबहादुर खातीले जानकारी दिए। शुक्रबार राति सैनिक टोल र बड्का टोलमा पनि बाढी पसेपछि थप ८५ घरपरिवारलाई सुरक्षित स्थानमा सारिएको उनले बताए।

नदीको बहाव अझै बढ्ने क्रममा रहेकाले प्रभावित परिवारलाई नारायणी नदीपारि सुरक्षित स्थानमा सार्ने तयारी भइरहेको खातीले बताए। कच्ची घरमा बाढी पसेपछि स्थानीयवासीको बिचल्ली भएको छ।

शनिबार बिहान ७ बजे गण्डक ब्यारेजमा गरिएको मापनअनुसार नारायणी नदीको बहाव प्रतिसेकेन्ड २ लाख ६७ हजार क्युसेक पुगेको छ। नदीले धार परिवर्तन गरी सुस्तातर्फ बग्न थालेपछि बहाव १ लाख क्युसेक पुग्नेबित्तिकै बस्तीमा बाढी पस्ने गरेको वडा सदस्य आदम खानले बताए। जलस्तर निरन्तर बढिरहेकाले सुस्ताका सबै बस्ती जोखिममा रहेको उनको भनाइ छ।

निर्माणाधीन तटबन्ध भारतीय पक्षले रोकेपछि १३२ मिटर भागमा तटबन्ध बन्न बाँकी रहेको र त्यहीँबाट नदीले कटान गर्दै बस्ती नजिक पुगेको स्थानीय बाबु खानले बताए। बाढीले बस्तीका साथै उखुखेतीमा पनि क्षति पुर्‍याएको उनले गुनासो गरे।

प्रमुख जिल्ला अधिकारी दीपकराज नेपालले जोखिममा रहेका परिवारलाई उद्धार गर्नुपर्ने अवस्था आए सुरक्षाकर्मीको टोली तयारी अवस्थामा राखिएको बताए।