गुल्मीमा जंगली जनावर धपाउन प्रयोग गरिएको करेन्टले एकको मृत्यु

गुल्मी – गुल्मी जिल्लाको मदाने गाउँपालिका-१ ओख्लेदहमा जंगली जनावर धपाउन प्रयोग गरिएको करेन्टले एक व्यक्तिको मृत्यु भएको घटना भएको छ। प्रहरीका अनुसार, मदाने गाउँपालिका-१ का सन्तबहादुर बिष्टले बारीमा नांगो तारमा करेन्ट लगाएका थिए। यसै क्रममा सोही करेन्टमा परेर वडानम्बर-४ की ४८ वर्षीया डालकुमारी खत्रीको मृत्यु भएको हो।

प्रहरीका अनुसार, मृतक खत्री नातीसहित भतिजीको घर ओख्लेदह गएकी थिइन्। उनी सम्पर्कविहीन भएपछि परिवारले खोजी कार्य थालेको थियो। खोजी क्रममा उनलाई करेन्टमा परेका अवस्थामा भेटिएको प्रहरीलाई जानकारी दिएको हो। घटनास्थलमा पुगेको प्रहरीले शवलाई पोष्मार्टमका लागि गुल्मी अस्पताल पठाएको छ।

यस घटनामा संलग्न सन्तबहादुर बिष्टलाई प्रहरीले नियन्त्रणमा लिएको छ। घटनाको थप अनुसन्धान भइरहेको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक वीरेन्द्र विश्वकर्माले जानकारी दिएका छन्।

यस घटनाले गाउँमा सुरक्षा र जनावर धपाउने प्रविधिको प्रयोग सम्बन्धी चिन्तालाई उजागर गरेको छ। प्रहरीले यस घटनाको विस्तृत अनुसन्धान गरी आवश्यक कानूनी कारवाही गर्ने बताएको छ।