अस्ट्रेलियाका राजदूत लिन जोनस्टनको राष्ट्रपति पौडेलसँग बिदाइ भेट

काठमाडौँ । नेपालका लागि अस्ट्रेलियाका राजदूत लिन जोनस्टनले राष्ट्रपति रामचन्द्र पौडेलसँग बिदाइ भेट गरेकी छन्। बुधबार शीतल निवासमा आयोजित भेटवार्तामा दुवै देशबीचको सहकार्य, आपसी हित र चासोका विषयमा विस्तृत कुराकानी भएको राष्ट्रपति कार्यालयका प्रवक्ता प्रदीपकुमार कोइरालाले जानकारी दिए।

भेटका क्रममा राष्ट्रपति पौडेलले राजदूत जोनस्टनले कार्यकालभर दुई देशबीचको सम्बन्ध मैत्रीपूर्ण बनाउनेतर्फ महत्वपूर्ण योगदान दिएको भन्दै धन्यवाद व्यक्त गरे। उनले अस्ट्रेलियासँगको सम्बन्ध अझै मजबुत बनाउन नेपाल प्रतिबद्ध रहेको पनि बताए।

राजदूत जोनस्टनले आफ्नो कार्यकालमा प्राप्त सहयोग, सद्भाव र सहकार्यका लागि नेपाल सरकारप्रति कृतज्ञता व्यक्त गर्दै दुवै देशबीचको सम्बन्ध आगामी दिनमा थप गहिरिने विश्वास व्यक्त गरेकी छन्।