डोल्पा कारागारबाट फरार दुई कैदी रुकुम पश्चिममा पक्राउ

काठमाडौं । डोल्पाको दुनैस्थित जिल्ला कारागारबाट फरार भएका दुई कैदी रुकुम पश्चिममा पक्राउ परेका छन्।

शनिबार बिहान ६ बजे कारागारबाट ६ कैदी र दुई थुनुवा गरी आठ जना फरार भएका थिए। उनीहरूमध्ये रुकुम पश्चिमको आठबिसकोट नगरपालिका–१० का ३२ वर्षीय रामबहादुर कामी र सल्यानको कुमाख गाउँपालिका–५ का २८ वर्षीय रेशम राना पक्राउ परेका हुन्।

जबरजस्ती करणीसम्बन्धी कसुरमा कैद भुक्तान गरिरहेका कामीलाई १८ वर्ष कैद सजाय सुनाइएको थियो। उनको अझै १३ वर्ष कैद भुक्तान गर्न बाँकी थियो। रानालाई १२ वर्ष कैद सजाय तोकिएकोमा नौ वर्ष बाँकी थियो। पक्राउ परेका दुवै जनालाई रुकुम पश्चिमबाट डोल्पा कारागार ल्याइँदै छ। फरार भएका अन्य कैदी तथा थुनुवाको खोजी जारी रहेको प्रहरीले जनाएको छ।