भोजपुरमा वन डढेलो नियन्त्रण र रोकथामका लागि सचेतनामूलक अभियान सुरु

भोजपुर – डिभिजन वन कार्यालयले सम्भावित वन डढेलो नियन्त्रण र रोकथामका लागि जिल्लाभरि सचेतनामूलक अभियान सुरु गरेको छ। हिउँदयाम सुरु भएसँगै बढ्दो तापक्रम र सुक्खापनका कारण वन क्षेत्रमा आगलागीको जोखिम बढ्दै जाँदा यस अभियानले विशेष ध्यान दिएको हो।

कार्यालयका अनुसार, जिल्लाका नौवटा स्थानीय तहका दर्जनौँ क्षेत्रहरू उच्च जोखिममा रहेका छन्। मानव गतिविधि, सुक्खा घाँसदाउरा, र गर्मीका कारण वन आगलागीका घटनाहरूको सम्भावना बढ्दै गएको छ। यसका लागि कार्यालयले आवश्यक अग्नि नियन्त्रण सामग्रीसहित जोखिमयुक्त क्षेत्रहरूमा जनचेतना फैलाउने कार्य अघि बढाएको हो।

डिभिजन वन कार्यालयका प्रमुख खुद्रुस मियाँका अनुसार, डढेलो न्यूनीकरणका लागि ११ प्रकारका २१६ थान सामाग्री जिल्ला विपद् जोखिम न्यूनीकरण समितिलाई हस्तान्तरण गरिएको छ। यस अभियानअन्तर्गत, पौवादुङ, हतुवागढी, रामप्रसादराई, अरुण, भोजपुर नगरपालिकाका क्षेत्रहरू, आमचोक, टेम्केमैयुङ, षडानन्द नगरपालिका र साल्पासिलिछो गाउँपालिकाका उच्च जोखिम क्षेत्रहरूलाई प्राथमिकता दिइएको छ।

विशेष गरी, पौवादुङ गाउँपालिकाका ठूलोदुम्मा, सानोदुम्मा, बास्तिम, श्यामशिला, औलिया, र रामप्रसादराई गाउँपालिकाका मानेभञ्ज्याङ, कावा दोभान, सीतेडाँडा, बेहेरे, सल्लेरी लगायत क्षेत्रहरूलाई उच्च जोखिममा राखिएको छ। त्यस्तै, अरुण गाउँपालिकाका जरायोटार, सिक्रेटार, याकु, र्याङ, याङपाङ र चम्पे, भोजपुर नगरपालिकाका पारपानी, टक्सार, आम्तेक, पालुवा, र दाँवा, साथै टेम्केमैयुङ र षडानन्द नगरपालिकाका विभिन्न क्षेत्रहरूलाई पनि सतर्कता अपनाउन आग्रह गरिएको छ।

वन कार्यालयले स्थानीय तह, सुरक्षा निकाय र समुदायिक वन उपभोक्ता समूहसँग समन्वय गरी जनचेतनामूलक कार्यक्रम, आगो नियन्त्रण सामग्री वितरण र नियमित निगरानीलाई तीव्रता दिएको छ। साथै, जथाभावी आगो बाल्न, खरानी फाल्न वा चुरोट फाल्न नदिन सर्वसाधारणलाई विशेष आग्रह गरिएको छ। समयमै सचेतना र सामूहिक प्रयासले सम्भावित क्षति न्युनिकरण गर्न उद्देश्य राखिएको यस अभियानले वन क्षेत्रको सुरक्षा सुनिश्चित गर्ने अपेक्षा गरिएको छ। रासस