पालुङ–हेटौँडा सडकमा १०० भन्दा बढी बस अलपत्र, हजारौँ यात्रु ३६ घण्टादेखि समस्यामा

काठमाडौँ । पालुङ–हेटौँडा सडकखण्डमा १०० भन्दा बढी यात्रुवाहक बस अवरुद्ध हुँदा हजारौँ यात्रु अलपत्र परेका छन्। शुक्रबारदेखि अवरुद्ध सडकका कारण दशैँलगायतका चाडपर्व मनाउन घर फर्किएका यात्रुहरू खानपिन र शौचालयको सुविधाबाट समेत वञ्चित भएका छन्।

सिन्धुली सडकखण्डमा शुक्रबार एलपीजी ग्यास बोकेको बुलेट पल्टिनु र सडक धस्सिनुका कारण यातायात प्रभावित भएको हो। वैकल्पिक मार्गका रूपमा प्रयोग गरिएको पालुङ सडक साँघुरो र घुमाउरो भएकाले दुवैतर्फका सवारी सहज रूपमा आवतजावत गर्न नसकेको बताइएको छ।

यात्रुहरू मकवानपुरको थाहा नगरपालिका–४, सिमभञ्ज्याङदेखि हेटौँडा जाने सडकखण्डको जङ्गल क्षेत्रमा रोकिएका छन्। नेटवर्क सुविधा नहुँदा उनीहरूलाई आफन्तसँग सम्पर्क गर्नसमेत कठिनाइ भएको छ। लामो समयदेखि जाममा फसेका बालबालिका, सुत्केरी महिला र ज्येष्ठ नागरिक बिरामी पर्न थालेको यात्रुहरूले बताएका छन्।

यात्रु प्रकाश उप्रेतीका अनुसार स्थानीय निकाय र मकवानपुर जिल्ला प्रशासन कार्यालयबीच प्रभावकारी समन्वय नहुँदा यात्रुहरू थप समस्यामा परेका छन्। उनले प्रमुख जिल्ला अधिकारी र प्रहरी प्रमुखलाई पटक–पटक ध्यानाकर्षण गराउँदा पनि सडक खुलाउन प्रभावकारी पहल नभएको गुनासो गरे।

शनिबार बिहान ६ बजेदेखि करिब नौ घण्टा सवारी आवागमन ठप्प भएको थियो। अपराह्न ३ बजेतिर केही सवारी अघि बढे पनि सडकमा जाम कायमै रहेको यात्रुहरूको भनाइ छ। हाल सिमभञ्ज्याङदेखि तल करिब १२० यात्रुवाहक बस आवागमनको प्रतीक्षामा रहेको बताइएको छ। विपरीत दिशाबाट काठमाडौँतर्फ गइरहेका १८ देखि २२ चक्के मालवाहक सवारीले पनि जाम थप बढाएको छ।

सडकलाई समयअनुसार खोल्ने र बन्द गर्ने गरिएको भन्दै यात्रुहरूले निर्धारित समयमा गन्तव्यमा पुग्न नसकेको बताएका छन्। उप्रेतीका अनुसार अझै करिब ३४ किलोमिटर कच्ची सडक पार गर्न बाँकी छ।