नेपाल-भारत सम्बन्धमा नयाँ उचाइ: भारतले प्रदान गरेको बेली ब्रिजको हस्तान्तरण

काठमाडौँ — भौतिक पूर्वाधार तथा यातायात मन्त्री कुलमान घिसिङले भारतलाई विपद्को समयमा र विकास निर्माणमा नेपालको सदैव विश्वासिलो साझेदार भएको बताएका छन्। उनले नेपालको पूर्वाधार विकास, कनेक्टिभिटी र विपद् प्रतिरोध क्षमतामा भारतले निरन्तर सहयोग पुर्‍याउँदै आएकोमा प्रशंसा व्यक्त गरे।

बिहीबार हेटौँडामा आयोजित आपत्कालीन प्रयोगका लागि भारतले दिएको बेली ब्रिजको हस्तान्तरण समारोहमा बोल्दै मन्त्री घिसिङले भारतको सहयोगले निर्मित हुलाकी राजमार्गले तराई क्षेत्रमा यातायातको पहुँच विस्तार गरी लाखौँ नागरिकलाई सेवा र बजारसँग जोडिएको बताए।

उनले नेपालका प्रमुख यातायात पूर्वाधार, जस्तै– पूर्व–पश्चिम राजमार्ग र ऐतिहासिक त्रिभुवन राजपथ निर्माणमा भारतको योगदानले नेपालको राष्ट्रिय यातायात र व्यापारको मेरुदण्ड मजबुत बनाएको बताए।

मन्त्री घिसिङले भारतीय एक्जिम बैंकमार्फत उपलब्ध गराइएका विस्तारित उदार ऋण सुविधाहरू अन्तर्गत सडक र पुल निर्माण परियोजनाहरूले क्षेत्रीय कनेक्टिभिटी बढाउन, दुर्गम क्षेत्रको पहुँच सुधार गर्न र राष्ट्रिय यातायात सञ्जाललाई बलियो बनाउने महत्त्वपूर्ण भूमिका खेलेको बताए।

‘भारतले उपलब्ध गराएका परियोजनाहरूले हाम्रो आर्थिक वृद्धिलाई गति मात्र दिएका छैनन्, हाम्रो राष्ट्रबिच जनस्तरको सम्बन्धलाई पनि गहिरो बनाएका छन्,’ उनले भने। ‘सीमापार रेल सञ्जाल, विशेषगरी– जनकपुर–कुथरा–बिजलपुरा–बर्दिबास लाइन र जोगबनी–विराटनगर कोरिडोरको विस्तार क्षेत्रीय एकीकरणको मुख्य आधार हो।’

विनाशकारी भूकम्पपछिको सङ्कटको घडीमा भारतले गरेको द्रुत र उदार सहयोगलाई स्मरण गर्दै मन्त्री घिसिङले सडक, पुल र सार्वजनिक सुविधाहरूको पुनर्निर्माणमा भारतको सहयोग नेपालको पुनः प्राप्तिका लागि महत्वपूर्ण रहेको बताए।

उनले यातायात पूर्वाधारबाहेक शिक्षा, स्वास्थ्य, ऊर्जा र क्षमतावृद्धि जस्ता सामाजिक क्षेत्रमा भारतको सहयोगले देशभरि सकारात्मक प्रभाव पारिरहेको उल्लेख गरे।

भविष्यमा हरित पूर्वाधार, जलवायु–उत्थानशील यातायात प्रणाली र डिजिटल कनेक्टिभिटीमा सहकार्य गर्ने अपेक्षा व्यक्त गर्दै उनले यो सम्बन्धलाई अझ मजबुत बनाउने विश्वास व्यक्त गरे। कार्यक्रममा नेपालका लागि भारतीय राजदूत नवीन श्रीवास्तवले यस प्रयासले लामो समय देखिको भारत–नेपाल विकास सहयोगलाई प्रतिबिम्बित गरेको बताए।

‘नेपालले अहिले सामना गरिरहेको कठिन परिस्थितिलाई पार गर्न भारत आवश्यक पर्ने कुनै पनि तरिका र रूपमा सहयोग गर्न प्रतिबद्ध छ,’ उनले भने। ‘बेली ब्रिजको हस्तान्तरण नेपालको आवश्यकताको समयमा र विकास तथा समृद्धिको लागि नेपालको साथमा उभिनेलाई दर्शाउँछ।’