गौर भन्सारअगाडिबाट स्रोत नखुलेको भारतीय रुपैयाँसहित दुई जना पक्राउ

रौतहट । रौतहटको गौर भन्सार कार्यालयअगाडिबाट स्रोत नखुलेको भारतीय रुपैयाँसहित दुई जना पक्राउ परेका छन्।

जिल्ला प्रहरी कार्यालय रौतहटका प्रवक्ता डीएसपी वसन्त गौतमका अनुसार शुक्रबार साँझ करिब ७:४५ बजे गौर नगरपालिका–१ स्थित भन्सार कार्यालयअगाडि संयुक्त चेकजाँचका क्रममा भारतबाट पैदल नेपालतर्फ आउँदै गरेका उनीहरूलाई शंकास्पद अवस्थामा नियन्त्रणमा लिइएको हो।

पक्राउ पर्नेमा भारतको शिवहर जिल्लाको रामपुर भटहा थाना निवासी २२ वर्षीय करण कुमार गिरी र ३५ वर्षीय लालबाबु राय छन्। गिरी मोहन गिरीका छोरा हुन् भने राय रामेश्वर रायका छोरा हुन्।

भन्सार सुरक्षा गार्ड र सशस्त्र प्रहरी बल नेपाल सीमा सुरक्षा गुल्म, गौरबाट खटिएको संयुक्त टोलीले जाँच गर्दा उनीहरूको साथबाट स्रोत नखुलेको भारतीय रुपैयाँ १ लाख ८ हजार ५ सय र एउटा मोबाइल बरामद भएको डीएसपी गौतमले बताए।

पक्राउ परेका दुवै जनालाई आवश्यक अनुसन्धान तथा कारबाहीका लागि गौर भन्सार कार्यालयमा बुझाइएको प्रहरीले जनाएको छ। बरामद रकमको स्रोत र उनीहरू नेपाल प्रवेश गर्नुको उद्देश्यबारे अनुसन्धान भइरहेको डीएसपी गौतमले जानकारी दिए।