काठमाडौं र भक्तपुरमा यातायात बिचौलियाविरुद्ध ठूलो अभियान, ३२ बिचौलिया पक्राउ

काठमाडौं । काठमाडौं र भक्तपुर जिल्लाका यातायात कार्यालयमा सेवा प्रवाहलाई बाधा पुर्‍याउँदै रकम असुली र अनावश्यक दुःख दिने बिचौलियाविरुद्ध प्रहरीले कडा कदम चालेको छ। मंगलबार भएको यस अभियानमा काठमाडौं र भक्तपुरका ३२ बिचौलियालाई पक्राउ गरिएको हो।

भक्तपुरको मध्यपुर थिमि नगरपालिका–५ र राधेराधेस्थित यातायात व्यवस्था कार्यालयबाट दुई बिचौलिया पक्राउ परेका छन्। सिन्धुपाल्चोकको जुगल गाउँपालिका–३ का २९ वर्षीया यमकुमारी श्रेष्ठ र चितवनको कालिका नगरपालिका–६ का ३० वर्षीय सुनिल थापा पक्राउ परेका हुन्। उनीहरुलाई प्रहरीले पक्राउ गरेको हो।

यातायात कार्यालयबाट सेवा लिन आउने सेवाग्राहीलाई अनावश्यक दुःख पुर्‍याउने, लाइसेन्स, नवीकरण, ब्लुबुक, सवारी दर्ताका काममा रकम असुली गर्ने आरोपमा उनीहरु पक्राउ परेका हुन्। प्रहरीका अनुसार, यी बिचौलियाहरुले सेवाग्राहीलाई फास्ट ट्रयाक सुविधा दिन्छु भन्दै रकम लिइरहेका थिए।

यस्तै, काठमाडौंमा पनि मंगलबार मात्रै १५ बिचौलिया पक्राउ परेका छन्। काठमाडौं महानगरपालिका–१५ सानोभर्‍याङस्थित यातायात कार्यालयबाट स्वम्भु वृत्तले ७ बिचौलियालाई पक्राउ गरेको हो।

पक्राउ पर्नेमा रौतहटका ३६ वर्षीय बलबहादुर सुनार, रामेछापको विज्ञान राई, काठमाडौंका सञ्जय राजवाहक र विमल तामाङ, रामेछापको रमेश कार्की, धादिङको कल्पना लम्साल, र नुवाकोटको उद्धव खनाल छन्। उनीहरूबाट ५३ बिलबुक र एक लाख २२ हजार रुपैयाँ बरामद गरिएको छ।

यस अभियानअन्तर्गत, प्रहरीले काठमाडौंको रानिभवन, स्वयम्भु र थानकोट कार्यालयहरूमा पनि बिचौलियालाई पक्राउ गरेको छ। स्वयम्भु वृत्तले ८ जना, जसमा पासाङ तामाङ, सुनिल लामा, सुदीप मगर, बुद्ध तामाङ, सुमेश नेपाली, अमन तामाङ, उज्जवल सिंह, र दिलिप राई पक्राउ गरेका हुन्।

यसैगरी, ललितपुर र सातदोबाटोको टोलीले पनि १५ जना बिचौलियालाई पक्राउ गरेको छ।

प्रहरीका अनुसार, यस अभियानले उपत्यका र आसपासका यातायात कार्यालयहरूबाट ३२ बिचौलियालाई हिरासतमा लिएको छ। यससँगै, सरकारी कार्यालयहरूमा बिचौलियाको बिगबिगी रोक्न प्रहरी सक्रिय रहेको छ। प्रहरीले कानुनी कारवाहीका लागि आवश्यक कदम चालिरहेको र सेवा प्रवाहलाई सहज र स्वच्छ बनाउने अभियान जारी रहेको जानकारी दिएको छ।

यस अभियानले सेवाग्राहीहरुलाई दु:ख र हैरानीबाट बचाउने साथै सरकारी सेवामा पारदर्शिता ल्याउने उद्देश्य राखेको छ।