काठमाडौंमा प्रदर्शित ‘भाइरल गोर्खे’ को प्रिमियर, सौगात मल्ल र श्रृष्टि श्रेष्ठको आकर्षक पहिरनले माया जित्दै

काठमाडौं – नायक सौगात मल्ल र नायिका श्रृष्टि श्रेष्ठ मुख्य भूमिकामा रहेको फिल्म ‘भाइरल गोर्खे’ को प्रिमियर मंगलबार साँझ न्यूरोडको एक हलमा भव्य रुपमा आयोजना भयो। फिल्मको यो पहिलो प्रदर्शनले दर्शक र फिल्म प्रेमीहरू माझ ठूलो चासो र उत्साह पैदा गरेको छ।

प्रिमियर स्थलमा सौगात मल्ल राष्ट्रिय पोशाक, दौरा र सुरुवालमा र श्रृष्टि श्रेष्ठ नेवारी परम्परागत पहिरनमा पुगेकी थिइन्। उनीहरूको पारम्परिक पहिरनले दर्शकहरूको ध्यान आकर्षित गरेको थियो र कार्यक्रम स्थलको माहोललाई अझ आकर्षक बनाएको थियो। यस अवसरमा पूजा शर्मा, सिसन बानियाँ, जयकिशन बस्नेत लगायतका स्टारहरू पनि उपस्थित थिए।

प्रिमियरपछि सिसन बानियाँले फिल्मको विषयवस्तु र कथावस्तुलाई प्रशंसा गर्दै भने, “यो फिल्म नयाँ र अनौठो विषयवस्तुमा बनेको छ। म सबैलाई यसलाई हेर्न सिफारिस गर्छु। यसले नेपाली फिल्म उद्योगमा नयाँ दिशा देखाउँछ।”

‘भाइरल गोर्खे’ को निर्माण एके ब्रदर कम्पनी, द जिएमआई एकेडेमी र निर्भाना फिल्म स्कुलको संयुक्त प्रयास हो। यस सिनेमामा सौगात मल्ल र श्रृष्टि श्रेष्ठको अतिरिक्त बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल र मिस पवीले पनि अभिनय गरेका छन्। फिल्मको निर्देशन निगम श्रेष्ठले गरेका हुन् भने निर्माता अमित श्रेष्ठ, विशाल ताम्राकार, महेश लामिछाने र केवल जंग कुँवर हुन्।

यस फिल्मले नेपाली दर्शक र समीक्षकहरू माझ राम्रो प्रतिक्रिया पाएको छ र यसले नयाँ फिल्म व्यवसायिकता र कथानकको नयाँ आयाम स्थापित गर्न सक्ने अपेक्षा गरिएको छ।

थप तस्बिरहरु:-