भक्तपुरमा डिजिटल घर नम्बर प्रणाली सुरु, स्मार्ट सिटीको मार्गमा थप कदम

भक्तपुर । सूर्यविनायक नगरपालिकाले आफ्नो नगर क्षेत्रका सबै घरहरूमा डिजिटल घर नम्बर टाँस्ने अभियान सुरु गरेको छ। नगरपालिकाले यस वर्षभित्र सम्पूर्ण घरहरूमा नम्बरिङ प्रक्रिया पूरा गर्ने उद्देश्यका साथ, आधिकारिक रुपमा डिजिटल घर नम्बर प्रणाली लागू गरेको हो।

सूर्यविनायक नगरपालिका (१० चित्तपोल पारीगाउँ)स्थित नगरप्रमुख वासुदेव थापाको घरमा डिजिटल नम्बर टाँस्ने कार्यक्रमको उद्घाटन गरिएको छ। यस कार्यक्रमलाई आधुनिक प्रविधिको प्रयोगद्वारा नगरका सबै घरमा डिजिटल नम्बर पुर्याउने उद्देश्यले सुरु गरिएको हो। नगरप्रमुख वासुदेव थापाले यस कदमले नगरलाई थप व्यवस्थित, पारदर्शी र स्मार्ट बनाउने लक्ष्य राखिएको बताए। उनले भने, “यो प्रणालीले नागरिकहरूलाई छिटो, सहज र प्रभावकारी सेवा प्रदान गर्न मद्दत गर्नेछ। भविष्यमा स्मार्ट सिटीको विकासका लागि आधार तयार पार्ने यस अभियानले महत्वपूर्ण भूमिका खेल्नेछ।”

नगरपालिकाका प्रमुख प्रशासकीय अधिकृत युवराज आचार्यले भने, “डिजिटल म्यापिङ र घर नम्बरिङ प्रणालीले नगरको तथ्याङ्क व्यवस्थापनलाई व्यवस्थित बनाउनेछ। यसले सेवाहरूलाई द्रुत र प्रभावकारी बनाउने साथै आपतकालीन सेवाहरूलाई लक्षित स्थानमा छिटो पुर्याउन मद्दत गर्नेछ।”

यस प्रणालीअन्तर्गत प्रत्येक घरमा क्यूआर कोडसहितको डिजिटल नम्बर जडान गरिनेछ। यसले घरको विस्तृत विवरण, परिवार विवरण, नक्साको समन्वय लगायतका सूचना डिजिटल रूपमा सङ्कलन गर्न मद्दत गर्दछ। यसले कर सङ्कलन, योजना निर्माण, विपद् व्यवस्थापन र सेवा प्रवाहलाई अझ प्रभावकारी बनाउने अपेक्षा गरिएको छ।

सूर्यविनायक नगरपालिकाको यस कदमले नगरलाई आधुनिक र स्मार्ट शहरको रूपान्तरणतर्फ थप उकालो लाग्न मद्दत गर्ने विश्वास नगरपालिकाले व्यक्त गरेको छ।