अफगानिस्तानमा १३ वर्षीय बालकबाट परिवारका हत्यारालाई गोली हानी सार्वजनिक मृत्युदण्ड

काबुल । अफगानिस्तानको खोस्त प्रान्तमा मंगलबार सार्वजनिक रूपमा एक अपराधीलाई मृत्युदण्ड दिइएको छ। भीडले खचाखच भरिएको स्थानीय स्टेडियममा करिब ८० हजार मानिसको अगाडि १३ वर्षीय बालकले आफ्नै परिवारका हत्यारामाथि गोली चलाएका हुन्।

एमु न्युजका अनुसार मृत्युदण्ड प्राप्त व्यक्तिमाथि उक्त बालकका १३ नातेदार—जसमध्ये महिलादेखि बालबालिकासम्म समावेश—को हत्या गरेको आरोप थियो। मृत्युदण्ड कार्यान्वयन गर्नुअघि तालिबान अधिकारीहरूले बालकलाई अपराधीलाई माफ गर्ने इच्छाबारे सोधेका थिए। तर उनले माफी अस्वीकार गर्दै न्यायको माग दोहोर्‍याए, जसपछि अधिकारीहरूले उनलाई बन्दुक हस्तान्तरण गरेका थिए।

मर्ने र मार्ने दुवै एउटै परिवारका नातेदार

तालिबानको सर्वोच्च अदालतले सार्वजनिक गरेको विवरण अनुसार मृत्युदण्ड पाएका व्यक्ति मंगल खान हुन्। उनले अब्दुल रहमान नामक व्यक्तिको हत्या गरेको आरोप थियो। खोस्त प्रहरी प्रवक्ता मुस्तगफिर गोरबाजका अनुसार मृतक र पीडित परिवारबीच नातागत सम्बन्ध रहेको खुलाइएको छ।

यससँगै सोही घटनामा संलग्न अन्य दुई जनालाई पनि मृत्युदण्डको सजाय सुनाइए पनि पीडित पक्षका केही साक्षीहरू उपस्थित नभएकाले उनीहरूको मृत्युदण्ड तत्काल कार्यान्वयन गरिएको छैन। तालिबान सरकारले एक दिन अघि नै सर्वसाधारणलाई खोस्तको केन्द्रीय स्टेडियममा भेला भएर सार्वजनिक सजाय हेर्न आग्रह गरेको थियो। उक्त आह्वानपछि ठूलो संख्यामा स्थानीय बासिन्दा कारबाही हेर्न पुगेका थिए।

किसास लागू: सर्वोच्च नेतृत्वको स्वीकृतिसहित सजाय

तालिबानको सर्वोच्च अदालतले प्रेस विज्ञप्ति जारी गर्दै मंगल खानलाई “किसास”—ज्यानको बदला ज्यान—अन्तर्गत सजाय दिइएको पुष्ट्याइँ गरेको छ। खान मूल रूपमा पकतिया प्रान्तका भए पनि खोस्तमा बस्दै आएका थिए। उनले अब्दुल रहमान, साबित र अली खानको हत्या गरेको अभियोग थियो।

यस घटनाको अध्ययन र प्रमाणहरूको मूल्यांकन तालिबानका तीन तहका अदालत—प्राथमिक, अपीलीय र तमीज—ले सूक्ष्म रूपमा गरेको अदालतले जनाएको छ। तीनै अदालतले सर्वसम्मतिले मृत्युदण्डको आदेश अनुमोदन गरेका थिए। अन्तिम स्वीकृतिका लागि आदेश तालिबानका सर्वोच्च नेता मौलवी हिबतुल्लाह अखुंदजादालाई पठाइएको र उनले निर्णय प्रमाणित गरेको उल्लेख छ।

मृत्युदण्ड कार्यान्वयनका क्रममा तालिबान सर्वोच्च अदालतका मुख्य न्यायाधीश, खोस्तका राज्यपाल, अपीलीय अदालतका प्रमुख तथा अन्य सरकारी अधिकारीहरू उपस्थित थिए। विशाल भीडको उपस्थितिबीच गरिएको यो सार्वजनिक सजायले अफगानिस्तानमा तालिबान सरकारद्वारा कार्यान्वित कठोर न्याय प्रक्रियाप्रतिको अन्तर्राष्ट्रिय बहस फेरि तीव्र बनाएको छ।