पदबाट हटाइएपछि निवर्तमान आईजीपी दानबहादुर कार्की सर्वोच्च अदालतमा रिट लिएर

काठमाडौं । पदबाट हटाइएको निर्णय अन्यायपूर्ण भएको भन्दै निवर्तमान प्रहरी महानिरीक्षक (आईजीपी) दानबहादुर कार्की सर्वोच्च अदालत पुगेका छन्।

उनका वकिलहरूले केहीबेरअघि सर्वोच्च अदालतमा रिट निवेदन पेस गरेका हुन्। अदालतको प्रशासनिक प्रक्रिया पूरा भएपछि निवेदन दर्ता हुने वा नहुनेबारे निर्णय हुनेछ।

सरकारले बुधबार कार्कीलाई आईजीपी पदबाट हटाएर प्रधानमन्त्रीको सुरक्षा सल्लाहकार नियुक्त गरेको थियो। मन्त्रिपरिषद् बैठकले उक्त पदमा अतिरिक्त प्रहरी महानिरीक्षक (एआईजी) मनोज केसीलाई नियुक्त गर्ने निर्णयसमेत गरेको थियो।

कार्कीका लागि प्रधानमन्त्री कार्यालयमा विशेष सुरक्षा सल्लाहकारको पद सिर्जना गरी पदस्थापन गर्ने निर्णय मन्त्रिपरिषद्ले गरेको थियो। उक्त निर्णयविरुद्ध कार्कीले आफू अन्यायमा परेको दाबी गर्दै सर्वोच्च अदालतमा रिट लिएर पुगेका हुन्।