खाद्य कम्पनीले धान खरिद सुरु गर्‍यो, महेन्द्रनगरमा कुपन अनिवार्य

काठमाडौं । खाद्य व्यवस्था तथा व्यापार कम्पनी लिमिटेडले चालु आर्थिक वर्ष २०८३/८४ का लागि सरकारले तोकेको समर्थन मूल्यमा किसानबाट धान खरिद प्रक्रिया अघि बढाएको छ। कम्पनीको प्रधान कार्यालयले बर्दियाको राजापुर शाखालाई पहिलो चरणमा ३० हजार क्विन्टल धान खरिद गर्न अख्तियारी दिएको छ भने कञ्चनपुरको महेन्द्रनगर शाखाले खरिद तालिका सार्वजनिक गरेको छ।

मन्त्रिपरिषद्को ११ जेठको निर्णयअनुसार यस वर्ष मोटा धानको समर्थन मूल्य प्रतिक्विन्टल ३ हजार ६०६ रुपैयाँ र मध्यम धानको ३ हजार ८६० रुपैयाँ तोकिएको छ। सोही मूल्यका आधारमा प्रधान कार्यालयले १२ कात्तिकमा राजापुर शाखालाई २५ हजार क्विन्टल मोटा र ५ हजार क्विन्टल मध्यम धान खरिद गर्न अनुमति दिएको हो।

वास्तविक किसानले मात्रै समर्थन मूल्यको लाभ पाऊन् भन्ने उद्देश्यले एकै पटक अस्वाभाविक रूपमा ठूलो परिमाणमा धान बिक्री गर्न आउने व्यक्तिलाई पहिचान गरी निरुत्साहित गर्न प्रधान कार्यालयले निर्देशन दिएको छ।

महेन्द्रनगरमा कुपन अनिवार्य

महेन्द्रनगर शाखाले १६ कात्तिकमा बसेको प्राथमिक खरिद समितिको निर्णयअनुसार धान खरिदको कार्यतालिका सार्वजनिक गरेको छ। धान बिक्री गर्न चाहने किसानले पहिले कुपन लिनुपर्नेछ। शाखा कार्यालय परिसरबाट १९ र २० कात्तिकमा कुपन वितरण गरिनेछ। कुपन पाएका किसानको धान २७ कात्तिकदेखि सार्वजनिक बिदाबाहेकका दिनमा गोदाममा तौलिनेछ।

कम्पनीले एक किसानबाट अधिकतम ३० क्विन्टलसम्म धान खरिद गर्ने नीति बनाएको छ। बिक्रीका लागि ल्याइने धान पराल, भुस, पोकटा, माटो र ढुङ्गारहित तथा सफा हुनुपर्नेछ। गुणस्तर जाँचपछि मात्र धान तौलिने कम्पनीले जनाएको छ। किसानले कुपनमा तोकिएको मितिमै धान ल्याउनुपर्नेछ। तोकिएको मितिभन्दा अन्य दिन ल्याइएको धान खरिद गर्न कम्पनी बाध्य नहुने सूचनामा उल्लेख छ।

आवश्यक कागजात र भुक्तानी

कुपन लिन जाँदा किसानले जग्गाधनी प्रमाणपत्र (लालपुर्जा) र नागरिकताको प्रतिलिपि बुझाउनुपर्नेछ। जग्गा भाडामा लिएर खेती गर्ने किसानले ठेक्का सम्झौतापत्र वा वडा कार्यालयको सिफारिसको सक्कल प्रति पेश गर्नुपर्नेछ। धान तौलाउने समयमा किसानको पहिचान खुल्ने वडा कार्यालयको सिफारिसपत्रको सक्कल प्रति पनि आवश्यक हुनेछ।

धान खरिदबापतको रकम नगदमा नभई सम्बन्धित किसानकै बैंक खातामा जम्मा गरिने कम्पनीले जनाएको छ। कम्पनीले तोकिएको मिति, मूल्य र मापदण्डअनुसार मात्रै धान बिक्री गर्न किसानलाई आग्रह गरेको छ।