डोल्पा कारागारबाट सुरुङ खनेर आठ कैदीबन्दी फरार, प्रहरीले सार्वजनिक गर्यो विवरण
- डोल्पा — डोल्पाको सदरमुकाम दुनैस्थित जिल्ला कारागारबाट सुरुङ खनेर फरार भएका आठ कैदीबन्दीको विवरण प्रहरीले सार्वजनिक गरेको छ।
- शुक्रबार मध्यराति फरार भएकामध्ये पाँच जना जबरजस्ती करणी र तीन जना चोरीसम्बन्धी मुद्दाका कैदीबन्दी हुन्।
डोल्पा — डोल्पाको सदरमुकाम दुनैस्थित जिल्ला कारागारबाट सुरुङ खनेर फरार भएका आठ कैदीबन्दीको विवरण प्रहरीले सार्वजनिक गरेको छ। शुक्रबार मध्यराति फरार भएकामध्ये पाँच जना जबरजस्ती करणी र तीन जना चोरीसम्बन्धी मुद्दाका कैदीबन्दी हुन्।
जिल्ला प्रहरी कार्यालय डोल्पाका प्रहरी नायब उपरीक्षक (डीएसपी) अनिलराज गिरीका अनुसार फरार आठ जनामध्ये छ जना कैद सजाय भोगिरहेका कैदी र दुई जना पुर्पक्षका लागि थुनामा रहेका व्यक्ति हुन्।
जबरजस्ती करणी मुद्दामा कैद भोगिरहेका फरार हुनेमा रुकुम पश्चिमको आठबिसकोट नगरपालिका–१० का राम विक, डोल्पाको त्रिपुरासुन्दरी नगरपालिका–७ का कालिप्रसाद रोकाया, वडा नं. ४ का धनबहादुर बुढा भनिने हरिबहादुर बुढा, सल्यानको कुमाख गाउँपालिका–५ का रेशम राना र जाजरकोटको बारेकोट गाउँपालिका–१ का यज्ञ विक छन्।
चोरी मुद्दामा कैद भोगिरहेका जाजरकोटको नलगाड नगरपालिका–९ का कैलाश भनिने कपिल परियार पनि फरार भएका छन्। चोरी मुद्दामै पुर्पक्षका लागि थुनामा रहेका रुकुम पश्चिमको आठबिसकोट नगरपालिका–५ का तिलक भण्डारी र वडा नं. ३ का आदेश भण्डारीसमेत फरार भएको प्रहरीले जनाएको छ।
प्रारम्भिक विवरणअनुसार उनीहरूले कैदीबन्दी बस्ने कोठाबाट पुरानो सेप्टी ट्याङ्की हुँदै बाहिर खेलमैदानतर्फ करिब ४ मिटर ६३ सेन्टिमिटर लामो सुरुङ खनेर भागेका हुन्। कारागारमा रहेका १७ जनामध्ये आठ जना फरार भएको शनिबार बिहान ६ बजे गणना गर्दा थाहा भएको थियो।
घटनाबारे जानकारी पाएपछि प्रमुख जिल्ला अधिकारी जुनु हमाल ढकाल र डीएसपी गिरीसहितको टोलीले कारागार पुगेर घटनास्थल निरीक्षण गरेको थियो। फरार कैदीबन्दीको खोजीका लागि जिल्लाका विभिन्न नाकामा सुरक्षा निगरानी कडा पारिएको र सुरक्षाकर्मी परिचालन गरिएको प्रहरीले जनाएको छ।
कारागारभित्रै सुरुङ खनेर एकैपटक आठ जना फरार भएपछि आन्तरिक सुरक्षा र निगरानी व्यवस्थामाथि प्रश्न उठेको छ। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया
यो पनि पढौँ
यो पनि पढौँ
