चाडपर्व सुरक्षाका लागि काठमाडौँ उपत्यकामा ३ हजार ५०६ प्रहरी परिचालन

काठमाडौँ । दसैँ, तिहार र छठलगायतका प्रमुख चाडपर्वलाई लक्षित गरी काठमाडौँ उपत्यकामा ३ हजार ५०६ जना प्रहरी परिचालन गरिएको छ। चाडपर्वका बेला हुन सक्ने आपराधिक गतिविधि नियन्त्रण गरी नागरिकलाई सुरक्षित रूपमा पर्व मनाउने वातावरण बनाउन प्रहरीले विशेष सुरक्षा योजना लागू गरेको हो।

जिल्ला प्रहरी परिसर काठमाडौँका अनुसार बजार, सार्वजनिक स्थल, यातायात केन्द्र तथा नागरिकको बढी आवतजावत हुने क्षेत्रमा चोरी, लुटपाट र ठगीजस्ता गतिविधि रोक्न प्रहरी परिचालन गरिएको छ।

चाडपर्व मनाउन घरबाहिर निस्कने, किनमेलका लागि बजार जाने र यात्रा गर्ने नागरिकको सुरक्षालाई प्राथमिकतामा राखेर व्यवस्था मिलाइएको परिसरका प्रवक्ता एवं प्रहरी उपरीक्षक दानबहादुर थापाले बताए।

उनका अनुसार परिचालित प्रहरीमध्ये १०० जना सादा पोसाकमा खटिएका छन्। उनीहरूले सार्वजनिक स्थल र भीडभाड हुने क्षेत्रमा निगरानी गर्ने, शङ्कास्पद गतिविधि पहिचान गर्ने तथा सम्भावित अपराध नियन्त्रणमा सहयोग गर्नेछन्।

प्रहरीले नियमित गस्तीका साथै प्रविधिको प्रयोगलाई पनि प्राथमिकता दिएको छ। सुरक्षा निगरानीका लागि सामुदायिक सेवा केन्द्र, ड्रोन क्यामेरा, सामाजिक सञ्जाल र तालिमप्राप्त कुकुर परिचालन गरिने परिसरले जनाएको छ। जनशक्ति र प्रविधिबीचको समन्वयले शङ्कास्पद गतिविधि पहिचान तथा सुरक्षा व्यवस्थापन प्रभावकारी हुने प्रहरीको अपेक्षा छ।

भीडभाड हुने क्षेत्र प्राथमिकतामा

चाडपर्वका बेला सर्वसाधारणको चहलपहल बढ्ने भएकाले सार्वजनिक स्थल, बसपार्क, वित्तीय संस्था तथा तिनका आसपासका क्षेत्र, सरकारी कार्यालय र चाडपर्वलक्षित बजारमा निगरानी बढाइएको छ। ती क्षेत्रमा नियमित प्रहरीसँगै सादा पोसाकका प्रहरीसमेत खटжээ।

दसैँ तथा तिहारका बेला किनमेल गर्ने, घर फर्किने र आफन्तकहाँ जाने मानिसको सङ्ख्या बढ्ने भएकाले बजार तथा यातायात केन्द्रमा सुरक्षा चुनौती बढ्न सक्ने प्रहरीको आकलन छ। चोरी, पाकेटमारी, ठगी तथा अन्य अवाञ्छित गतिविधि रोक्न प्रहरी टोलीलाई सक्रिय बनाइएको परिसरले जनाएको छ।

वित्तीय संस्था र आर्थिक कारोबार हुने क्षेत्रको सुरक्षामा पनि विशेष ध्यान दिइएको छ। चाडपर्वका बेला सर्वसाधारणले रकम बोकेर हिँड्ने भएकाले सम्भावित आपराधिक गतिविधि नियन्त्रण गर्न निगरानी बढाइएको प्रहरीले जनाएको छ।

१४ सेक्टरमा सुरक्षा योजना

सुरक्षा व्यवस्थालाई व्यवस्थित र प्रभावकारी बनाउन काठमाडौँ उपत्यकाका १४ वटा सेक्टरलाई लक्षित गरी योजना लागू गरिएको प्रहरी उपरीक्षक थापाले बताए। सम्बन्धित प्रहरी वृत्तका प्रमुखले आफ्नो क्षेत्रको सुरक्षा व्यवस्थाको प्रत्यक्ष निगरानी गर्नेछन् भने जिल्ला प्रहरी परिसरले समग्र अनुगमन गर्नेछ।

“हामीले उपत्यकाका १४ वटा सेक्टरलाई लक्षित गरी सुरक्षा योजना लागू गरेका छौँ। ती सेक्टरमा प्रहरी वृत्त प्रमुख खटिनेछन् भने त्यसको निगरानी परिसरले गर्नेछ। परिसर प्रमुख र वरिष्ठ प्रहरी अधिकृत पनि योजनाअनुसार खटिनुहुनेछ,” थापाले भने।

सेक्टरगत जिम्मेवारीले प्रहरीको उपस्थितिलाई प्रभावकारी बनाउनुका साथै घटना वा सूचना प्राप्त भएपछि तत्काल टोली परिचालन गर्न सहज हुने प्रहरीको भनाइ छ। योजनाअन्तर्गत नियमित गस्ती, शङ्कास्पद गतिविधिको निगरानी र आवश्यकताअनुसार तत्काल प्रहरी परिचालनलाई प्राथमिकता दिइएको छ।

प्रहरीले सर्वसाधारणलाई आफ्नो घर तथा सम्पत्तिको सुरक्षामा ध्यान दिन, अपरिचित व्यक्तिको गतिविधिप्रति सचेत रहन र शङ्कास्पद गतिविधि देखिएमा नजिकको प्रहरी कार्यालयमा जानकारी गराउन आग्रह गरेको छ।