देशका विभिन्न स्थानबाट लागुऔषधसहित ३१ जना पक्राउ

काठमाडौँ । नियमित गस्तीमा खटिएको प्रहरी टोलीले देशका विभिन्न स्थानबाट लागुऔषधसहित ३१ जनालाई पक्राउ गरेको छ। केन्द्रीय प्रहरी समाचारकक्षका अनुसार उनीहरूलाई काठमाडौँ, सुनसरी, ललितपुर, उदयपुर, दाङ, नवलपरासी पूर्व, झापा, मोरङ, भक्तपुर, बाँके, कास्की र कैलालीका विभिन्न स्थानबाट पक्राउ गरिएको हो।

प्रहरीले काठमाडौँको तारकेश्वर नगरपालिका–८ बाट ३२ ग्राम ५०० मिलिग्राम खैरो हेरोइन र ३० हजार रुपैयाँसहित आठ जनालाई तथा सुन्धाराबाट एक जनालाई पक्राउ गरेको छ। सुनसरीको कोशी गाउँपालिका–१ स्थित भन्सार टोल र ललितपुर महानगरपालिका–२८, हरिसिद्धिस्थित तफाखल पार्कबाट पनि एक–एक जना पक्राउ परेका छन्। उदयपुरको बेलका नगरपालिका–१, आम्बासीबाट पाँच किलोग्राम गाँजासहित एक जनालाई नियन्त्रणमा लिइएको छ।

त्यसैगरी, दाङको तुलसीपुर उपमहानगरपालिका–५, रानीजरुवा र नवलपरासी पूर्वको देवचुली नगरपालिका–१६, टाँगिकोटबाट एक–एक जना पक्राउ परेका छन्। झापाको दमक नगरपालिका–७ बाट चार जना र मोरङको कानेपोखरी गाउँपालिका–६, बरगाछी चोकबाट एक जना पक्राउ परेका छन्।

भक्तपुरको मध्यपुर थिमि नगरपालिका–१, लोकन्थलीबाट ट्रामाडोलका एक हजार ६१० ट्याब्लेट, नाइट्राभेटका २६ ट्याब्लेट र ६७ हजार ४०० रुपैयाँसहित एक जनालाई प्रहरीले नियन्त्रणमा लिएको छ। बाँकेको डुडुवा गाउँपालिका–१, पिपरहवाबाट १० किलोग्राम गाँजासहित स्थानीय रामनरेश कुर्मी पक्राउ परेका छन्।

कास्कीको पोखरा महानगरपालिका–९, महेन्द्रपुलबाट एक जना र कैलालीको टीकापुर नगरपालिका–१, बनगाउँबाट दुई जनालाई बिहीबार साँझ पक्राउ गरिएको प्रहरीले जनाएको छ।