दसैँअघि मुख्य राजमार्ग सञ्चालनमा ल्याउने सरकारको तयारी

काठमाडौँ — चाडपर्व नजिकिँदै गर्दा बाढीपहिरोका कारण अवरुद्ध सडक मर्मत गरी दसैँअघि नै मुख्य राजमार्ग सञ्चालनमा ल्याउन सरकारले तीव्र तयारी थालेको छ।

सडक विभागका प्रवक्ता शुभराज न्यौपानेका अनुसार प्राकृतिक विपद्बाट क्षति पुगेका राजमार्ग तथा सडक मर्मतको काम तीव्र गतिमा भइरहेको छ। रसुवासहित नुवाकोट, धादिङ, चितवन र गोरखाका सडक सुधारका काम पनि अघि बढाइएको उनले बताए।

“आगामी चार–पाँच दिनभित्र रसुवाको धुन्चेसम्म यातायात सञ्चालन गर्ने लक्ष्य छ। मुस्ताङतर्फको सडक पनि चाँडै सुचारु हुनेछ,” न्यौपानेले भने। यात्रामा केही असहजता हुन सक्ने भए पनि सडक अवरुद्ध भएकै कारण उपत्यकाबाट घर जान नपाउने वा खाद्यान्न तथा अत्यावश्यक सामग्रीको ढुवानी रोकिने अवस्था नआउने उनको भनाइ छ।

नेपाल प्रहरीले सार्वजनिक गरेको पछिल्लो विवरणअनुसार, भदौ १० गतेको भोटेकोशी बाढीका कारण बागमती प्रदेशको रसुवा जिल्लाका सबै मुख्य राजमार्ग अवरुद्ध छन्। गण्डकी प्रदेशको म्याग्दीस्थित रघुगङ्गा गाउँपालिका–२, बैसरीमा असोज १० गते गएको पहिरोले बेनी–जोमसोम सडकखण्ड पूर्ण रूपमा बन्द छ।

नवलपरासी (बर्दघाट सुस्ता पूर्व) को बौदीकाली गाउँपालिका–३, जन्ती पहिरो क्षेत्रमा असोज १४ गतेदेखि प्रभावित कालीगण्डकी करिडोर अहिले एकतर्फी सञ्चालनमा छ। प्रहरीले उक्त सडकमा ठूला सवारीसाधन चल्न नसक्ने जनाएको छ।

त्यस्तै, असोज १८ गतेको बाढीबाट प्रभावित मनाङको बेँसीसहर–खाङ्सार सडकखण्ड पनि एकतर्फी रूपमा सञ्चालनमा आएको छ। बाँकी अवरुद्ध सडक पूर्ण रूपमा खुलाउन आवश्यक समन्वय र काम भइरहेको प्रहरीले जनाएको छ।