रोशी खोलाले बगाएका बीपी राजमार्गका अस्थायी डाइभर्सन पुनर्निर्माण सुरु

काभ्रेपलाञ्चोक । अविरल वर्षापछि रोशी खोलाले बगाएका बीपी राजमार्गका अस्थायी डाइभर्सन पुनर्निर्माण सुरु गरिएको छ। सडक डिभिजन कार्यालय भक्तपुरले यातायात सञ्चालन सहज बनाउने उद्देश्यले काम अघि बढाएको जनाएको छ।

कार्यालयका प्रमुख सुमन योगेशका अनुसार बाढीले नमोबुद्ध नगरपालिका–६ को चौकीडाँडा, रोशी गाउँपालिका–७ को घुमाउने तथा रोशी गाउँपालिका–११ र १२ का तीन स्थानमा रहेका डाइभर्सन बगाएको थियो।

यसैबीच, बीपी राजमार्गअन्तर्गत रोशी गाउँपालिका–७ को चारसयबेंसी, रोशी–८ को गिम्दीबेंसी र रोशी–११ को माम्तीमा पहिरो पन्छाउने काम भइरहेको योगेशले जानकारी दिए।

अविरल वर्षाका कारण नमोबुद्ध नगरपालिकाको चौकीडाँडादेखि सिन्धुलीको नेपालथोकसम्मको बीपी राजमार्गमा यातायात पूर्ण रूपमा अवरुद्ध छ। डाइभर्सन पुनर्निर्माण र पहिरो हटाउने काम पूरा भएपछि यातायात सञ्चालन सहज हुने अपेक्षा गरिएको छ।