लगातार वर्षापछि सुदूरपश्चिमका सात पहाडी जिल्लामा सवारी आवागमन बन्द

धनगढी । लगातारको वर्षाले बाढीपहिरोको जोखिम बढेपछि सुदूरपश्चिमका सात पहाडी जिल्लामा सवारीसाधन सञ्चालनमा रोक लगाइएको छ। कैलाली र कञ्चनपुरबाहेक प्रदेशका सबै जिल्लामा शनिबार बिहान ७ बजेदेखि आइतबार बिहान ७ बजेसम्म सवारी आवागमन बन्द गरिएको हो।

सम्बन्धित जिल्ला प्रशासन कार्यालयहरूले सूचना जारी गर्दै छोटो तथा लामो दूरीका सबै सवारीसाधन सञ्चालन नगर्न आग्रह गरेका छन्।

प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक नवराज कार्कीका अनुसार लगातारको वर्षाबाट हुन सक्ने सम्भावित जोखिमलाई ध्यानमा राखेर प्रशासनले रोक लगाउने निर्णय गरेको हो। तराईका कैलाली र कञ्चनपुरमा जोखिम तुलनात्मक रूपमा कम रहेकाले त्यहाँ सवारीसाधन सञ्चालन भइरहेका छन्।

ट्राफिक प्रहरीले सूचना थाहा नपाई पहाडतर्फ जाँदै गरेका केही सवारीसाधनलाई कैलालीको खानीडाँडामा रोकेर फर्काएको जनाएको छ।

सुदूरपश्चिमका नौवटै जिल्लामा शुक्रबारदेखि निरन्तर वर्षा भइरहेको छ। बाढी तथा पहिरोको जोखिम रहेकाले सतर्क रहन र प्रशासनको सूचनाको पालना गर्न स्थानीय प्रशासनले सर्वसाधारणलाई आग्रह गरेको छ।