रसुवा बाढी उद्धार: स्निफर डग, ड्रोन र हेलिप्याड तयार गर्दै सशस्त्र प्रहरी

काठमाडौँ । काठमाडौं र आसपासका क्षेत्रहरूमा भारी वर्षाका कारण आएको बाढीले ठूलो विनाश गर्न सक्ने खतरा देखिएको छ। यसलाई मध्यनजर गर्दै रसुवा, नुवाकोट, धादिङ र चितवन लगायतका जिल्लामा सशस्त्र प्रहरी बल नेपालका युनिटहरूबाट उद्धार सामग्रीसहितको टोलीहरू परिचालन गरिएको छ।

अतिआवश्यक तयारीका साथ ‘डिजास्टर रिलिफ सिस्टम’ (डीआरएस) कन्टेनरहरू प्रभावित क्षेत्रमा तुरुन्तै पुर्‍याउने कार्य भइरहेको छ। यसका साथै, अन्य क्षेत्रहरूमा रहेका कन्टेनरहरूलाई पनि प्रभावित क्षेत्रमा केन्द्रित गरी पठाइएको छ।

बाढीले घाइते भएकाहरूको तात्कालीन प्राथमिक उपचारका लागि ‘मास क्याजुअल्टी भेहिकल’ (एमसीभी) सहितको चिकित्सा र उद्धार टोलीहरू खटिएको छ। नदी किनार र जोखिमयुक्त बस्तीहरूमा सशस्त्र प्रहरीको गस्ती टोली साइरन बजाएर र माइकमार्फत सचेतना दिँदै सुरक्षीत स्थानतर्फ सर्न आग्रह गरेको छ। घाइतेहरूको उपचारका लागि नेपाल एपीएफ अस्पतालमा शय्याहरू तयारी अवस्थामा राखिएका छन्।

दुर्घटनाको बेला प्रभावित क्षेत्रमा आपतकालीन उद्धार र सुरक्षित उडानका लागि नेपाली सेना र निजी क्षेत्रका हेलिकप्टरहरूको सुरक्षित ल्यान्डिङ जोनहरू तयार पारिएको छ। रसुवागढी भन्सार र यार्ड क्षेत्रमा पुरिएका व्यक्तिहरूको खोजीका लागि सशस्त्र प्रहरी बलको ‘के-नाइन’ स्निफर कुकुर टोली परिचालित भएको छ।

साथै, हराइरहेका नागरिकहरूको अवस्था पत्ता लगाउन र क्षतिको मूल्याङ्कन गर्न ड्रोनको परिचालन गरिएको छ। विस्थापित शिविरहरूमा हैजा र पानीजन्य रोग फैलिन नदिन आपतकालीन खानेपानी शुद्धीकरण र औषधि वितरण कार्य सुरु गरिएको छ।

भोटेकोशी र त्रिशूली नदीको माथिल्लो तटीय क्षेत्रमा थुनिएको हिमपहिरो खुल्न सक्ने वा थप बाढी आउन सक्ने जोखिमको पूर्वसूचना प्राप्त भएपछि चिनियाँ सुरक्षा निकायहरूसँग निरन्तर समन्वय र सूचना आदानप्रदान भइरहेको छ।

यस परिस्थिति सामना गर्नका लागि सञ्चार, राहत र उद्धार कार्यहरू तीव्र गतिमा जारी रहेको छ। स्थानीय प्रशासन र सुरक्षा निकायहरूले जनतालाई सतर्कता अपनाउन र आवश्यक कदम चाल्न आग्रह गरेका छन्।