केपी ओली झापामा घर–घर पुग्दै, निर्वाचन अभियानलाई तीव्रता दिएपछि सक्रियता बढाउँदै
- दमक ।
- निर्वाचन नजिकिँदै गर्दा नेकपा एमालेका अध्यक्ष केपी शर्मा ओली आफ्नो निर्वाचन क्षेत्रमा थप सक्रिय हुँदैछन्।
दमक । निर्वाचन नजिकिँदै गर्दा नेकपा एमालेका अध्यक्ष केपी शर्मा ओली आफ्नो निर्वाचन क्षेत्रमा थप सक्रिय हुँदैछन्। यस पटक ओलीले अघिल्ला निर्वाचनहरूमा भन्दा थप घर–घर पुग्ने र मतदातासँग प्रत्यक्ष भेटघाट गर्ने अभियान थालेका छन्।
अघिल्लो पटक मात्र सीमित आमसभामा देखिने ओली अहिले भने आफ्नै निर्वाचन क्षेत्रमा व्यापक जनसंपर्क कार्यक्रम सञ्चालन गरिरहेका छन्। पछिल्लो केही हप्तामा बढ्दो राजनीतिक दबाब र आफ्नो क्षेत्रमा देखिएका चुनौतीहरूलाई मध्यनजर गर्दै उनले आफ्नै निर्वाचन क्षेत्रमा केन्द्रित भएका हुन्।
गत माघ २३ गते झापामा आएर ७ दिनमा करिब ८० वटा गाउँ परिभ्रमण गरेका ओली फेरि आज पुनः झापामा आउन लागेका छन्। बिहान १० बजेर २० मिनेटमा काठमाडौंबाट भद्रपुर विमानस्थल अवतरण गरी निर्वाचन क्षेत्रमा प्रवेश गर्ने तयारीमा छन्।
उनको आजको कार्यक्रम अनुसार ओलीले शिक्षक भेलामा, धिमाल जातिको भेलामा र मुस्लिम समुदायका नागरिकहरूसँग भेटघाट गर्नेछन्। त्यसपछि उनले अस्थायी निवासमा स्थानीय कार्यकर्ता र नागरिकसँग प्रत्यक्ष भेटघाट गर्ने कार्यक्रम तय गरिएको छ।
एमाले झापा क्षेत्र नम्बर ५ का चुनावी कमान्डर तथा पार्टी केन्द्रीय सदस्य देवेन्द्र दाहालका अनुसार ओली फागुन ६ गतेसम्म झापामै रहनेछन्। यस अवधिमा उनी विभिन्न गाउँ र टोलमा पुगेर घरदैलो कार्यक्रम संचालन गर्ने योजना बनाइएका छन्। हरेक दिन कम्तीमा ६ देखि ७ स्थानमा कार्यक्रम आयोजना हुने गरी रुट तय गरिएको छ।
दमकका अध्यक्ष राम पौडेलका अनुसार सोमबार बिहान ११ बजे दमक–५ को यलम्बर चोक, ११:५० मा दमक–६ को शंखधर चोक, दिउँसो १ बजे दमक–७ को तबिन चोक, २ बजे दमक–१ को हल्दार चोक, ३ बजे दमक–३ को गजकाली मन्दिर र ४ बजे दमक–३ का आमचोकमा ओलीले जनसंपर्क कार्यक्रम सञ्चालन गर्नेछन्।
यी सबै कार्यक्रममा ओलीले स्थानीय नागरिकसँग प्रत्यक्ष संवाद गर्न सक्ने वातावरण मिलाएका छन्, जसले आगामी चुनावी माहोललाई अझ प्रबल बनाउने विश्वास पार्टी नेताहरूमाझ व्यक्त गरिएको छ।
प्रतिक्रिया
यो पनि पढौँ
यो पनि पढौँ
