धनुषाको बटेश्वरमा वित्तीय सचेतना अभिवृद्धि गर्न शैक्षिक हाटबजारको सफल आयोजना

जनकपुर — धनुषाको बटेश्वरस्थित श्री राष्ट्र्रिय आधारभूत विद्यालय खोरिया सीतापुरमा बालबालिकामा वित्तीय जागरूकता र आर्थिक व्यवहारिकता विकास गर्न नयाँ पहल गरिएको छ। सामाजिक संस्था सोसल ल्यावको आयोजनामा, एभरेष्ट बैंकको आर्थिक सहयोगमा, विद्यालयमा मंगलबार विशेष शैक्षिक हाटबजारको आयोजना गरियो।

यस कार्यक्रममा विद्यालयका कक्षा ३ देखि ८ सम्मका करिब २३० विद्यार्थीले प्रत्यक्ष लाभ प्राप्त गरे। विद्यार्थीहरूको नियमित उपस्थिती, सरसफाई, गृहकार्य र अनुशासनको आधारमा कक्षा शिक्षकहरूले दैनिक अधिकतम ३ प्वाइन्ट दिने व्यवस्था गरिएको थियो। प्रत्येक प्वाइन्टलाई पाँच रुपैयाँको टोकन मनीमा परिणत गरी सोसल ल्याबले विद्यार्थीलाई उपलब्ध गराएको थियो। महिनाको अन्त्यमा विद्यार्थीहरूले प्राप्त प्वाइन्टको आधारमा आफूले चाहेको शैक्षिक सामग्री र खेलकुद सामग्री किन्ने अवसर पाएका थिए।

सोसल ल्याबका कार्यकारी निर्देशक अजित भट्टले बताए, “यस कार्यक्रमको मुख्य उद्देश्य बालबालिकामा वित्तीय सचेतना अभिवृद्धि गर्नु, स्वास्थ्यपूर्ण आर्थिक बानीहरू विकास गर्नु र सकारात्मक व्यवहारलाई प्रोत्साहन गर्नु हो।” उनले थपे, “पैसाको मूल्यप्रति जागरूकता र बचतको अभ्यास बालबालिकाका लागि महत्वपूर्ण हुन्छ।”

विद्यालयका प्रधानाध्यापक राजनारायण मण्डलले भने, “यस परियोजनाले विद्यार्थीहरूको उपस्थिती, गृहकार्य र बानीमा सकारात्मक परिवर्तन ल्याएको देखिन्छ।” विद्यालयमा लागु भएको यस मोडेलले बालबालिकाहरूलाई पैसाको मूल्य र बचतको महत्त्व सिकाउन सफल भएको विद्यालय प्रशासनले बताए।

एभरेष्ट बैंक धनुषाधामका कर्मचारी आदित्य झाले भने, “विद्यार्थीहरूले बैंकले प्रदान गरेको टोकन मनीलाई उपयोग गरी सामान किन्ने र बाँकी रकम बैंकमा जम्मा गर्ने अभ्यासले उनीहरूलाई बचत र खर्चको सही अर्थ सिकाएको छ।” उनीहरूले थपे, “विद्यार्थीहरूको उत्साह र उमंग देख्दा हामी पनि अत्यन्त खुशी भएका छौं।”

बटेश्वर युवा संजालका संयोजक सरोजकुमार महतोले भने, “यस प्रकारको शैक्षिक हाटबजारले विद्यार्थीहरूको समग्र विकासमा महत्वपूर्ण योगदान पुर्‍याउनेछ। स्थानिय सरकारको सक्रिय सहभागिता र लगानी आवश्यक छ।”

मधेश प्रदेशमा पहिलो पटक बटेश्वर गाउँपालिका र क्षीरेश्वरनाथ नगरपालिका अन्तर्गतका विद्यालयहरूमा यस परियोजनाको सफल कार्यान्वयन भएको हो। यसअघि, सोसल ल्यावले बागमति प्रदेशका ८ वटा विद्यालयमा यस कार्यक्रमलाई सफलतापूर्वक सम्पन्न गरेको छ।

विद्यालयका प्रधानाध्यापक राजनारायण मण्डलले भने, “यस परियोजनाले विद्यार्थीहरूको उपस्थिती, गृहकार्य, अनुशासन र सरसफाइमा ठूलो सुधार आएको देखिन्छ।” यस कार्यक्रमले बालबालिकाको व्यवहार, बानी र संस्कारमा उल्लेखनीय परिवर्तन ल्याएको विद्यालय प्रशासनको विश्वास छ।