सिरहामा १७ वर्षीया अविना दनुवारको हत्या, प्रहरीले दोषी फेला पार्न सकेन

सिरहा । सिरहाको कर्जन्हा नगरपालिका–१ बल्टिया गाउँकी १७ वर्षीया अविना दनुवारको हत्या भएको तीन हप्तासम्म पनि अपराधीको पहिचान हुन सकेको छैन। मुख्य अभियुक्तलाई पक्रन र घटनाको सत्यतथ्य खुलासा गर्न प्रहरीको प्रयास जारी रहे पनि, दोषीको खोजी अझै टुङ्गिएको छैन। यसले पीडित परिवार र स्थानीय बासिन्दामा आक्रोश थप बढाएको छ।

गत मङ्सिर २२ गते, अविनाको शव कर्जन्हा नगरपालिका–२, बन्दीपुरस्थित नेपाल राष्ट्रिय फूलकुमारी माध्यमिक विद्यालय नजिकैको झाडीमा फेला परेको थियो। शव अर्धनग्न अवस्थामा भेटिएपछि बलात्कारपछि हत्या भएको आशंका गरिएको थियो। पीडित परिवार र स्थानीय समुदायले घटनाको छिटो अनुसन्धान गरी दोषीलाई कानुनी कारबाहीको माग गरेका छन्।

अविनाको आमा दयावती दनुवारले भनिन्, “छोरी गुमाएको पीडा त छँदैछ, तर दोषीलाई अझै पनि पत्ता नलाग्नु ठूलो अन्याय हो। हाम्रो आवाज सुनेको कोही छैन, पहुँच भएकाहरूको कुरा तुरुन्तै सुनिन्छ, हामीजस्ता सामान्य परिवारको आवाज कसैले सुनिरहेका छैनन्।”

स्थानीय वडाध्यक्ष फणीन्द्रप्रसाद पोखरेलले प्रहरीको लामो ढिलाइप्रति चिन्ता व्यक्त गर्दै भने, “तीन हप्तासम्म पनि दोषीको पहिचान हुन सक्नु भएको छैन। दोषीलाई छिटो पक्राउ गरी कानुनी प्रक्रिया अघि बढाउन आवश्यक छ।”

जिल्ला प्रहरी कार्यालय सिरहाका सूचना अधिकारी प्रहरी नायब उपरीक्षक रमेशबहादुर पालले भने, “घटना गम्भीर प्रकृतिको भएकाले विभिन्न कोणबाट अनुसन्धान भइरहेको छ। प्रमाणका आधारमा मुख्य अभियुक्तसम्म पुग्ने प्रयास जारी छ। अनुसन्धान जारी छ।”

यस विषयमा स्थानीयले दोषीलाई छिटो पक्राउ गर्न र न्याय सुनिश्चित गर्नका लागि आन्दोलन समेत गरेका थिए। प्रहरीले थप अनुसन्धान र आवश्यक कदमहरू चालिरहेको जनाएको छ।