कलङ्कीबाट स्वचालित हतियारसहित तीन जना पक्राउ,

काठमाडौं । स्वचालित हतियारसहित तीन जनालाई काठमाडौं उपत्यका अपराध अनुसन्धान कार्यालयको टोलीले पक्राउ गरेको छ। पक्राउ पर्नेमा काठमाडौं कलङ्की बस्ने २८ वर्षीय रसिल जोशी, दार्चुला दुहुँ गाउँपालिका–४ का १९ वर्षीय डेविड उर्फ रामचन्द्र कुँवर र काठमाडौं बाफल बस्ने ३१ वर्षीय विराट प्रसाद जोशी रहेका छन्।

अपराध अनुसन्धान कार्यालयका एसपी तथा प्रवक्ता काजिकुमार आचार्यका अनुसार पक्राउ अभियुक्तहरूको साथबाट ‘नेपाल पुलिस’ उल्लेख गरिएको, सिरियल नम्बर ५५००९९१६ भएको टाइप–५४ मोडेलको पेस्तोल बरामद गरिएको छ।

पक्राउ परेकामध्ये रसिल जोशी जेनजी आन्दोलनको समयमा लागुऔषधसहित पक्राउ परि प्रहरी वृत्त स्वयम्भूमा थुनामा रहेका थिए। आन्दोलनको तनावका बीच उनी हिरासतबाट फरार भएका थिए। सो समूहले जेनजी आन्दोलनकै क्रममा प्रहरीको हतियार लुटेको आरोप समेत लागेको जनाइएको छ।

आपराधिक गतिविधिमा संलग्न रहेको सूचनाका आधारमा उनीहरूलाई विशेष अपरेसनमार्फत पक्राउ गरिएको जनाएको छ। हाल घटनाबारे थप अनुसन्धान जारी रहेको प्रहरीले बताएको छ।