राजविराजको गजेन्द्रनारायणसिंह अस्पतालमा आगलागी, करोडौंको क्षति

सप्तरी । सप्तरीको राजविराजस्थित गजेन्द्रनारायणसिंह अस्पतालको डेन्टल (दन्तरोग) शाखामा सोमबार बिहान अचानक आगलागी भएको छ। यस घटनाले अस्पतालको बहिरङ्ग (ओपिडी) सेवा प्रवाह हुने भवनमा रहेका अस्पतालका महत्वपूर्ण उपकरण र रेकर्ड राख्ने कोठामा ठूलो क्षति पुगेको छ। आगलागीबाट लाखौं रुपैयाँ बराबरको सम्पत्ति नष्ट भएको र मानवीय क्षति नभएको अस्पतालले जनाएको छ।

डेन्टल विभागका डा. दीपाली झाका अनुसार, उपचारका क्रममा आएका बिरामीहरु अस्पतालमा उपचार गरिरहेका बेला डेन्टल उपकरणको कम्प्रेसरमा विद्युत् सर्ट भएर अचानक आगो लागेको थियो। यसले गर्दा उक्त स्थानमा रहेका अन्य डेन्टल उपकरणहरुमा पनि आगो फैलिएको उनले बताए।

अस्पतालका अनुसार, आगलागीले तीन थान डेन्टल उपकरण, दुई थान कम्प्रेसर, दुई थान डेस्क, तीन थान डेन्टल कुर्सी, एक थान फ्रिज र सात वटा पङ्खा जलेर पूर्ण रुपमा नष्ट भएका छन्। मेडिकल सुपरिडेन्ट अवधेशकुमार मिश्राका अनुसार, करिब रु २५ लाखभन्दा बढीको क्षति भएको छ।

अग्नि नियन्त्रक र प्रहरीको टोलीले घटनास्थलमा पुगेर आगो नियन्त्रणमा लिएका थिए। प्रहरी, सशस्त्र प्रहरी नेपाली सेना र स्थानीयको समन्वयमा आगो निभाइएको हो। यस घटनामा कुनै मानवीय क्षति नभएको अस्पतालले जनाएको छ। साथै, आगलागीले अस्पतालको ओपिडी रेकर्डका महत्वपूर्ण कागजातहरू पनि जलेर नष्ट भएका छन्।

यसैबीच, घटना पछि अस्पतालमा पुगेको राष्ट्रिय स्वतन्त्र पार्टीबाट निर्वाचित प्रतिनिधिसभा सदस्य रामजी यादवले आगलागीबाट भएको क्षति र यसको विवरण बुझ्नुभएको जानकारी दिइएको छ। अस्पताल प्रशासनले यस घटनाको छानबिन र क्षतिपूर्तिको प्रक्रिया अघि बढाइरहेको बताएको छ।

यो घटना अस्पताल र स्थानीय समुदायमा गम्भीर चिन्ताको विषय बनेको छ। सरकार र सम्बन्धित निकायहरुले पीडितलाई राहत र क्षतिपूर्ति उपलब्ध गराउने आश्वासन दिएका छन्।