रवि लामिछानेलाई नख्खु कारागारबाट सिंहदरबार लगिएर जाँचबुझ आयोगमा ल्याइए

काठमाडौँ — राष्ट्रिय स्वतन्त्र पार्टी (रास्वपा) का सभापति रवि लामिछानेलाई नख्खु कारागारबाट सिंहदरबार ल्याइएको छ। उनलाई जेनजी प्रदर्शनमा भएको दमनबारे छानबिन गर्न गठित उच्चस्तरीय जाँचबुझ आयोगमा उपस्थित गराइएको हो।

भदौ २४ गते लामिछाने कारागारबाट बाहिरिएका थिए। यसअघि आयोगले सिंहदरबारस्थित आफ्नो कार्यालयमा बोलाएर नख्खु कारागारका जेलर सत्यराज जोशीसँग बयान लिएका थिए। जेलरसँग आयोगका पदाधिकारीले रवि लामिछानेलाई नख्खु कारागारबाट बाहिरिँदा सार्वजनिक गरिएको पत्रबारे सोधपुछ गरेका थिए।

लामिछानेसँग पनि उक्त विषयमा सोधपुछ तथा बयान लिइने तयारी भइरहेको एक आयोगका सदस्यले रातोपाटीलाई बताए। लामिछाने जेलबाट निस्केपछि सार्वजनिक गरिएको पत्रमा भनिएको छ — “सहकारीसँग जोडेर गरिएको राजनीतिक मुद्दा फिर्ता लिन समय लाग्ने हुँदा गृह सचिवको आदेशअनुसार थुनामुक्त गरिएको।” पत्रमा थप भनिएको छ — “थुनामा राख्दा थप अन्याय हुन जाने र देशमा अमन चयन थप खलबल पर्ने हुँदा निजलाई तत्काल थुना मुक्त गर्न निर्णय गरिएको।”

भदौ २४ गते प्रदर्शनकारीहरूले रविलाई जेलबाट बाहिर ल्याएपछि रास्वपाका कार्यकर्ताहरूले आफूलाई पत्रमा हस्ताक्षर गराएको जेलर जोशीले बयानमा खुलाएका छन्। आयोगका एक सदस्यले जोशीको बयान उद्धृत गर्दै बताए, “रवि लामिछाने निस्केको डेढ घण्टापछि मलाई पत्र ल्याएर हस्ताक्षर गराइयो, सुरक्षा चुनौतीको कारण पत्रको विषय हेर्न पाएको छैन।”

यसअघि उच्चस्तरीय जाँचबुझ आयोगका अध्यक्ष गौरीबहादुर कार्की, सदस्य विज्ञानराज शर्मा र विन्देश्वरी भण्डारीले नख्खु कारागारको अवस्थाबारे निरीक्षण गरेका थिए।