‘सीआरभी’ र ‘क्युआरटी’ जल्दा प्रहरीले कसरी काम गरिरहेको छ ?

काठमाडौँ । भक्तपुरको सूर्यविनायक नगरपालिका–४, कटुञ्जेमा असोज ६ मा दुई पक्षबिच झगडा भएपछि स्थानीयले प्रहरी कन्ट्रोल रुममा खबर गरे । झगडा नियन्त्रण गर्न प्रहरी प्रभाग कटुञ्जेका प्रहरी नायव निरीक्षक राजन बनमाला र जवान राजबहादुर ऐर घटनास्थलमा पुगे ।

उनीहरू मोटरसाइकलमा गएका थिए । झगडा गर्नेहरूले प्रहरीलाई नै आक्रमण गरे । घटनास्थलमा खटिएका दुई जनाले सञ्चार सेटमार्फत सीआरभी (कन्ट्रोल रुम भेहिकल)को टिम पठाइदिन आग्रहर गरे । तर, आपत्कालीन अवस्थामा उपत्यका प्रहरी कार्यालयबाटै परिचालन गरिने चारपाङ्ग्रे सवारी (सीआरभी) कटुञ्जे क्षेत्रमा थिएन ।

तत्काल थप मद्दत नपुग्दा प्रहरीमाथि आक्रमण गर्नेहरू भोलिपल्टमात्रै पक्राउ परे । भक्तपुरमा मात्र होइन, काठमाडौँ उपत्यकाभर शान्ति सुरक्षामा प्रयोग गरिने प्रहरीका सवारी साधन जलेका छन् । जेनजी प्रदर्शनकारीले भदौ २४ मा उपत्यकाका १०३ वटा हलुका चारपाङ्ग्रे सवारीमा आगजनी गरे । उच्छृङ्खल समूहले २३ वटा हेभी गाडीमा आगजनी गरेको उपत्यका प्रहरी कार्यालयका एसएसपी शेखर खनालले बताए ।

हलुका सवारी साधनमा सीआरभी र मोबाइल गाडी पर्छन् । उपत्यकाभर घटनास्थलबाट खबर आएको ५ मिनेटमै सम्बन्धित ठाउँमा पुग्ने प्रहरीको रणनीति थियो । सो रणनीति अनुसार उपत्यकाभर मोटरसाइकलमा क्विक रेस्पोन्स टिम (क्युआरटी) परिचालन गरिन्थ्यो । क्युआरटी मोटरसाइकल पनि २१० वटा जलेका छन् । सीआरभी र क्युआरटी नहुँदा घटनास्थलमा पुग्न र अपराध नियन्त्रण गर्न प्रहरीलाई चुनौती बढेको छ । एसएसपी खनालले भने, ‘केही अप्ठ्यारो र चुनौती थपिएका छन् ।’

जेनजी पुस्ताको प्रदर्शनपछि अपराधमा संलग्नहरूको मनोबल बढेको र प्रहरीमाथि आक्रमण हुन थालेको प्रहरी अधिकृतहरू बताउँछन् । स्थानीयहरूले पनि सामाजिक सञ्जालमा घटनाबारे लेख्दै समाजमा सुरक्षा दिनुपर्ने प्रहरी आफैँ ‘असुरक्षित’ हुन थालेको टिप्पणी गरेका छन् ।

काठमाडौँ, भक्तपुर र ललितपुरमा शान्ति सुरक्षा कायम गर्न विभिन्न प्रदेशबाट सवारी साधन झिकाइएको छ । एसएसपी खनाल भन्छन्, ‘प्रहरी प्रधान कार्यालयले प्रदेशहरूका युनिटबाट केही गाडी मगाएर हामीलाई उपलब्ध गराएको छ ।’

काठमाडौँ उपत्यकाका कतिपय युनिटले स्थानीय वडा र नगरपालिकाहरूसँग गाडी लिएर प्रयोग गर्न थालेका छन् । स्थानीय निकाय र सर्वसाधारणसँगको सहकार्यमा उपत्यकामा आगजनी भएका सबै युनिटबाट सेवा सुचारु गरिएको एसएसपी खनालले जानकारी दिए । उनले भने, ‘लगभग सबै ठाउँबाट सेवा प्रवाह सुरु भइसक्यो ।’

आगजनी गरिएका गाडी र भवनको क्षति विवरण उपत्यका प्रहरी कार्यालयले प्रहरी प्रधान कार्यालयमा पठाएको छ । नयाँ गाडी खरिद र भवनको पुनर्निर्माणको योजना प्रहरी प्रधान कार्यालयले बनाउने एसएसपी खनालले बताए । उनले भने, ‘क्षतिको विवरण पठाएका छौँ । अरु योजना हेडक्वाटरले बनाउँछ ।’