आर्थिक दबाबबीच मधेश सरकारले ४ करोडको विलासी गाडी किन्दै; टेन्डर आह्वान

जनकपुरधाम । मुलुक आर्थिक दबाबमा रहेका र रसुवामा आएको विनाशकारी बाढीपछि राहत तथा पुनर्निर्माणको आवश्यकता बढिरहेका बेला मधेश सरकारले करिब ४ करोड रुपैयाँ पर्ने विलासी गाडी खरिद प्रक्रिया अघि बढाएको छ ।

श्रम तथा यातायात मन्त्रालयले गाडी खरिदका लागि भदौ २५ गते बोलपत्र आह्वान गरेको हो । चालु आर्थिक वर्षमा मन्त्रालयको शीर्षकमा चारपाङ्ग्रे सवारीसाधन खरिदका लागि ३ करोड ५० लाख रुपैयाँ विनियोजन गरिएको थियो । थप ५० लाख रुपैयाँ उपलब्ध गराउन मन्त्रालयले अर्थ मन्त्रालयलाई पत्र पठाएको छ ।

टेन्डर प्रक्रिया अघि बढाउन अर्थ मन्त्रालयसँग स्वीकृति मागिएको श्रम तथा यातायात मन्त्रालयका उपसचिव जयकुमार राउतले बताए ।

यसैबीच, अर्थ मन्त्रालयले विनियोजित बजेटबाट करिब ७ अर्ब रुपैयाँ घट्ने अनुमान गर्दै विभिन्न शीर्षकमा २० देखि १०० प्रतिशतसम्म कटौती गर्न मातहतका निकायलाई पत्राचार गरेको छ । केही शीर्षकको बजेट पीएलएमबीएसमा रोक्का गरिएको छ, जसमा सवारीसाधन खरिदको बजेट पनि परेको छ ।

तर, श्रम तथा यातायात मन्त्रालयका निमित्त सचिव रञ्जित यादवले चालु आर्थिक वर्षको बजेटमै अतिविशिष्ट अतिथिका लागि सवारीसाधन खरिद गर्न रकम विनियोजन भएकाले प्रक्रिया अघि बढाइएको बताए । उनका अनुसार गाडी खरिद प्रक्रिया अघि बढाउन मुख्यमन्त्री तथा मन्त्रिपरिषद्को कार्यालयबाट पत्राचार भएको थियो ।

अर्थ मन्त्रालयले अन्य सवारीसाधन खरिदका लागि बजेट रोक्का गरे पनि अतिविशिष्ट व्यक्तित्वका लागि खरिद गरिने गाडीको बजेट भने रोक्का नगरिएको दाबी गरेको छ । नयाँ गाडी राष्ट्रपति वा प्रधानमन्त्री मधेश भ्रमणमा आउँदा प्रयोग गर्ने उद्देश्यले खरिद गर्न लागिएको बताइएको छ ।