सिमरामा घटनाको अनुसन्धानका लागि प्रहरीले दुई वडा अध्यक्षलाई पक्राउ

बाराको सिमरामा भएको घटनाको अनुसन्धानका लागि प्रहरीले दुई जना वडा अध्यक्षलाई पक्राउ गरेको छ। इलाका प्रहरी कार्यालय सिमरामा परेको किटानी जाहेरीका आधारमा प्रहरीले दुवै जना वडा अध्यक्षलाई पक्राउ गरेको हो। पक्राउ पर्नेहरूमा जीतपुरसिमरा उपमहानगरपालिका–२ का वडाध्यक्ष ४० वर्षीय धनबहादुर श्रेष्ठ र वडा नम्बर ६ का वडाध्यक्ष ३४ वर्षीय कैमुद्दिन अन्सारी रहेका छन्। दुवै जना नेकपा (एमाले) का निर्वाचित जनप्रतिनिधि हुन्।

सिमरा चोकमा बुधबार जेनजी समूह र नेकपा एमालेका कार्यकर्ताबीच भएको झडपमा जेन–जी समूहका ‘सम्राट्’ उपनामले चिनिने साइकुल उपाध्यायसहित केही व्यक्तिहरू घाइते भएका थिए। घाइते उपाध्यायले वडाध्यक्ष श्रेष्ठ र अन्सारीसहित केही व्यक्तिविरुद्ध इलाका प्रहरी कार्यालय सिमरामा नियोजित आक्रमण गरेको भन्दै किटानी जाहेरी दिएका थिए। सोही जाहेरीका आधारमा प्रहरीले दुवै वडाध्यक्षलाई नियन्त्रणमा लिएको जनाएको छ।

जिल्ला प्रहरी कार्यालय बाराका प्रमुख प्रहरी उपरीक्षक सन्तोष तामाङका अनुसार नियन्त्रणमा लिइएका दुई जनालाई प्रारम्भिक बयानको कार्य अघि बढाइएको छ। घटना सङ्लग्न अन्य व्यक्तिहरूलाई पनि पक्राउ गरी आवश्यक कार्वाहीका लागि प्रक्रिया अघि बढिरहेको प्रहरीले जनाएको छ। घटनामा संलग्न अन्य सबैलाई पक्राउ गर्नका लागि खोजी भइरहेको छ।

यसैबीच, सिमराका युवाहरूले बिहिबार बिहानदेखि सडकमा उत्रिएर विरोध प्रदर्शन गरेका छन्। उनीहरूले घटनाका मुख्य आरोपित वडाध्यक्षहरूलाई पक्राउ गर्न र न्यायका लागि माग गरेका छन्। सिमरा बजार क्षेत्र अहिले पुनः तनावग्रस्त बनेको छ। जेन–जी समूहका युवाहरूले सिमरा–पथलैया सडक खण्डमा टायर बालेर यातायात अवरुद्ध पारेका छन्। यसका कारण बजारका पसलहरू बन्द भएका छन् र लामो तथा छोटो दूरीका सवारी साधनहरू ठप्प भएका छन्।

सिमरा प्रहरी प्रशासनले ठूलो संख्यामा प्रहरी परिचालन गरी शान्ति व्यवस्था कायम राख्नको लागि प्रयासरत रहेको जनाएको छ। घटनाको अनुसन्धान जारी रहेको छ र आवश्यक कार्वाही प्रक्रिया अघि बढिरहेको छ।