मुस्ताङमा अत्यधिक चिसोका कारण विकास कार्य ठप्प

मुस्ताङ – अत्यधिक चिसो र हिमपातका कारण मुस्ताङ जिल्लामा विकास निर्माण कार्य पूर्णरूपले ठप्प भएको छ। हिउँदको मौसम र तापक्रम माइनस २० डिग्रीसम्म झरेपछि यहाँका पाँचवटै स्थानीय तहका विभिन्न पूर्वाधार विकासका कामहरू प्रभावित भएका हुन्।

उत्तर/दक्षिण जोड्ने राष्ट्रिय गौरवको सडक खण्डको (बेनी–जोमसोम–कोरला) सडक र पुल निर्माण योजनाहरु अत्यधिक चिसो र हिमपातका कारण रोकिएका छन्। आयोजना प्रमुख तेजस्वी शर्माले बताए, “अत्यधिक चिसोका कारण उपकरणहरू पनि सञ्चालनमा आउन सकेको छैन। चैत महिनापछि मात्रै निर्माण कार्य पुनः सुरु हुने सम्भावना छ।”

कोरला सडक खण्डअन्तर्गत कागबेनी–छुसाङ सडकको कालोपत्र काम र घमी खोलामा रहेको ४० मिटर लामो पुलको निर्माण कार्य पनि चिसोका कारण प्रभावित भएको हो। यसका साथै, थासाङ गाउँपालिका–२ कोवाङदेखि जोमसोमसम्मको १७ किलोमिटर सडक र अन्य पुलहरूको काम पनि चिसो र हिमपातका कारण अवरुद्ध भएको छ।

यस्तै, निर्माण कम्पनीहरुको ढिलासुस्ती र चिसोका कारण पुराना बहुवर्षीय योजनाहरू पनि प्रभावित भएका छन्। मुस्ताङस्थित विभिन्न कार्यालयहरूले भने, चिसोका कारण कामहरु स्थगित गर्न बाध्य भएका छन्। घरपझोङ–२ को सडक, लार्जुङ खोलाको पुल र कैकु खोलाको पुलको काम पनि रोकिएको छ।

अत्यधिक चिसोका कारण यहाँको तापक्रम माथिल्लो मुस्ताङमा माइनस २० डिग्री र तल्लो मुस्ताङमा माइनस १० डिग्रीसम्म झरेको छ। यसले जिल्लाका सरकारी कार्यालयका कर्मचारीहरूलाई काम गर्न कठिनाइ भएको छ भने धेरैजसो कर्मचारीहरू आफ्ना कार्यस्थलबाट टाढा बसेका छन्।

यसैबीच, जिल्ला सुरक्षा र शान्ति कायम राख्न सुरक्षा निकायहरू सक्रिय रहेका छन्। माथिल्लो मुस्ताङमा मानवविहीन जस्तै अवस्था रहे पनि, सुरक्षा कर्मचारीहरू आफ्नो जिम्मेवारीमा खटिएका छन्।