असमको होजाई जिल्लामा रातभरि रेल दुर्घटना, आठ हात्तीको मृत्यु र पाँचवटा डिब्बा खसेको अपडेट

असम – असमको होजाई जिल्लामा शनिबार बिहानै एक ठूलो रेल दुर्घटना भएको छ। तीव्र गतिमा गुडिरहेको रेलसँग हात्तीको बथान ठोक्किएर घटनास्थलमै आठ हात्तीको मृत्यु भएको हो भने एक हात्ती गम्भीर घाइते भएको छ।

दुर्घटनापछि, हात्तीलाई ठक्कर दिएको स्थानबाट करिब पाँचवटा डिब्बा र रेलको इन्जिनसहित रेल पटरीबाट खसेर दुर्घटनाग्रस्त भएका छन्। नर्थ इस्ट फ्रन्टियर रेलवे (एनएफआर) का अनुसार, नयाँ दिल्ली तर्फ जाँदै गरेको यो रेल राति करिब २:१७ बजे दुर्घटनामा परेको हो।

रेलवे प्रवक्ताले यस घटनाप्रति दुःख व्यक्त गर्दै, यात्रुहरूलाई कुनै चोटपटक नलागेको पुष्टि गरेका छन्। चालकले हात्तीको बथान देखेपछि आपतकालीन ब्रेक लगाए पनि, दूरी कम भएका कारण ठक्करबाट जोगिन सकेन।

रेलवे प्रशासनले जारी गरेको आधिकारिक बयानमा भनिएको छ कि, यो दुर्घटना हात्ती हिँड्ने निश्चित गरिएको ‘कोरिडोर’ क्षेत्रमा नभई अन्यत्रै भएको हो। अहिले घटनास्थलमा उद्धार कार्य जारी रहेको छ र रेल सेवा पुनः सञ्चालन गर्न प्रयास भइरहेको छ।

यो घटना प्राकृतिक जीवन र मानव जीवनबीचको सहअस्तित्वको चुनौतीलाई पुनः उजागर गर्दछ। लोकल प्रशासन र वन विभागले घटनाको विस्तृत अध्ययन र आवश्यक कदम चाल्ने प्रतिज्ञा गरेका छन्।