विशेष सुरक्षा सल्लाहकारको पत्र लिन सिंहदरबार गएनन् दानबहादुर कार्की, सरकारविरुद्ध सर्वोच्चमा रिट

काठमाडौं । महानिरीक्षक पदबाट हटाइएका दानबहादुर कार्कीका लागि सरकारले प्रधानमन्त्री तथा मन्त्रिपरिषद् कार्यालयमा ‘विशेष सुरक्षा सल्लाहकार’ पद सिर्जना गरेको छ। तर, पदको पत्र बुझ्न उनी बिहीबार सिंहदरबार गएनन्। बरु, सरकारको निर्णयविरुद्ध रिट निवेदन लिएर सर्वोच्च अदालत पुगे।

बुधबार बसेको मन्त्रिपरिषद् बैठकले कार्कीलाई नेपाल प्रहरीको महानिरीक्षक पदबाट हटाएर डा. मनोजकुमार केसीलाई नयाँ महानिरीक्षक नियुक्त गरेको थियो। त्यही बैठकले कार्कीलाई प्रधानमन्त्री तथा मन्त्रिपरिषद् कार्यालयमा रहने गरी नयाँ पद सिर्जना गर्ने निर्णय पनि गरेको थियो।

प्रधानमन्त्री तथा मन्त्रिपरिषद् कार्यालयका प्रवक्ता हेमराज अर्यालका अनुसार, कार्कीका लागि कार्यालयमा कार्यकक्षको व्यवस्था गरिएको छ। प्रधानमन्त्रीको टोलीका सल्लाहकार, सचिव तथा अन्य कर्मचारीका लागि कार्यालय व्यवस्थापन गर्न समस्या नरहेको उनले बताए।

‘कार्यालयमा अतिरिक्त कोठा हुन्छन्। अतिरिक्त सचिव, सचिवलगायतका लागि कार्यकक्ष व्यवस्थापन गरिएकै हुन्छ,’ अर्यालले भने, ‘त्यसक्रममा सुरक्षा सल्लाहकारका लागि पनि कोठाको व्यवस्था गरिएको हुनुपर्छ।’

प्रधानमन्त्री कार्यालय स्रोतका अनुसार, कार्कीका लागि कोठा नम्बर २०७ मा कार्यकक्ष तयार गरिएको छ। उनलाई नेपाल सरकारका सचिवसरह सुविधा उपलब्ध गराउने निर्णय भएको स्रोतको भनाइ छ। सचिवसरह सुविधा दिइएमा आफ्नै कार्यकक्ष, सवारीसाधन र सुरक्षा उपलब्ध हुनेछ।