दसैँमा नेपाल प्रहरी र सशस्त्र प्रहरीको निःशुल्क बस सेवाबाट ३,५८५ यात्रु लाभान्वित

काठमाडौँ। दसैँ पर्वका अवसरमा नेपाल प्रहरी र सशस्त्र प्रहरी बलले काठमाडौँ उपत्यकामा सञ्चालन गरेको निःशुल्क बस सेवाबाट ३ हजार ५८५ यात्रु लाभान्वित भएका छन्।

प्रहरी प्रधान कार्यालयका अनुसार नेपाल प्रहरीले तीनवटा सवारीसाधनमार्फत कात्तिक ३ र ४ गते सेवा दिएको थियो। कात्तिक ३ गते ५१० र कात्तिक ४ गते ८९६ गरी कुल १ हजार ४०६ यात्रुले निःशुल्क यात्रा गरेका थिए।

त्यस्तै, सशस्त्र प्रहरी बलका दुईवटा बसले अष्टमी, नवमी र दशमीका दिन सेवा दिएका थिए। सशस्त्र प्रहरीका सहप्रवक्ता शैलेन्द्र थापाका अनुसार ती बसबाट २ हजार १७९ यात्रुले उपत्यकामा निःशुल्क यात्रा गरे। दसैँका बेला सार्वजनिक सवारीसाधनको उपलब्धता कम हुने भएकाले यात्रुको आवागमन सहज बनाउन दुवै सुरक्षा निकायले निःशुल्क बस सेवा सञ्चालन गरेका हुन्।