सुनसरीमा ९१५ किलो ६८० ग्राम गाँजा बरामद, चार जना पक्राउ

सुनसरी — प्रहरीले इनरुवा नगरपालिका–४, ज्ञानोदय टोलस्थित एक घरबाट ९१५ किलो ६८० ग्राम गाँजा बरामद गरेको छ। घटनामा संलग्न रहेको आरोपमा चार जनालाई पक्राउ गरिएको जिल्ला प्रहरी कार्यालय सुनसरीले जनाएको छ।

प्रहरीका अनुसार आइतबार दिउँसो साढे १ बजे स्थानीय बुलबुल यादवको घरमा गाँजा बिक्री–वितरण भइरहेको सूचनाका आधारमा खानतलासी गरिएको थियो। घरको कोठामा लुकाएर राखिएको गाँजा बरामद भएपछि घरधनी ३६ वर्षीय बुलबुल यादवसहित २३ वर्षीय सन्तोष यादव, ३० वर्षीय आशिष यादव र दुहबी नगरपालिका–१० का २२ वर्षीय कुन्दन यादवलाई नियन्त्रणमा लिइएको हो।

जिल्ला प्रहरी कार्यालयका सहायक सूचना अधिकारी हेमराज ओलीका अनुसार चाडपर्वको समयमा प्रहरीलाई छलेर गाँजा भारतीय सीमा कटाउने तयारी भइरहेको अवस्थामा बरामद गरिएको हो।

प्रहरीले उनीहरूको साथबाट प्र.१–०२–००१ प ९१९९ नम्बरको मोटरसाइकल पनि बरामद गरेको छ। पक्राउ परेका चारै जना, मोटरसाइकल र गाँजालाई जिल्ला प्रहरी कार्यालय सुनसरीमा राखेर थप अनुसन्धान भइरहेको प्रहरीले जनाएको छ।