कोरिया पठाउने भन्दै दुई वर्षदेखि अलपत्र पारेको आरोपमा कन्सल्टेन्सी सञ्चालक पक्राउ

काठमाडौं । कोरिया पठाइदिने भन्दै दुई वर्षदेखि एक युवकलाई अलपत्र पारेको आरोपमा प्रहरीले एक जनालाई पक्राउ गरेको छ।

पक्राउ पर्नेमा नुवाकोटको बेलकोटगढी नगरपालिका–११ का २८ वर्षीय गणेश पाण्डे छन्। उनलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो।

एक महिलाले आफ्नो छोरालाई कोरिया पठाइदिने भन्दै दुई वर्षदेखि अलपत्र पारेको आरोप लगाउँदै टिकटकमार्फत प्रधानमन्त्री र गृहमन्त्रीसँग कारबाहीको माग गरेकी थिइन्। त्यसपछि प्रहरीले घटनाबारे अनुसन्धान अघि बढाएको थियो।

अनुसन्धानका क्रममा प्रहरीले न्यू सफल ग्लोबल कन्सल्टेन्सीका सञ्चालक पाण्डेलाई पक्राउ गरेको हो। उनीमाथि ठगीसम्बन्धी कसुरमा अनुसन्धान भइरहेको प्रहरीले जनाएको छ।