विराटनगरमा दुर्घटनाग्रस्त स्कार्पियोबाट ३९८ किलो गाँजा बरामद
- विराटनगर ।
- विराटनगर महानगरपालिका–३, आयल निगमस्थित सडकमा दुर्घटनामा परेको स्कार्पियोबाट प्रहरीले ३९८ किलो गाँजा बरामद गरेको छ।
विराटनगर । विराटनगर महानगरपालिका–३, आयल निगमस्थित सडकमा दुर्घटनामा परेको स्कार्पियोबाट प्रहरीले ३९८ किलो गाँजा बरामद गरेको छ। शनिबार राति भएको घटनापछि स्कार्पियो चालक फरार भएका छन्।
प्रहरीका अनुसार शनिबार राति करिब १० बजे कोशी राजमार्गमा प्रहरी चौकी बरगाछीको टोलीले आकस्मिक चेकजाँच गरिरहेको थियो। इटहरीबाट विराटनगरतर्फ आउँदै गरेको को १ च ७३९९ नम्बरको स्कार्पियो प्रहरी टोलीलाई देखेपछि यू–टर्न गरेर भागेको थियो।
भाग्ने क्रममा स्कार्पियोले सोही दिशाबाट आउँदै गरेको बागमती प्रदेश ०१–०३० च ४८२२ नम्बरको कारलाई ठक्कर दिएको थियो। त्यसपछि चालक स्कार्पियो छाडेर फरार भएका थिए।
दुर्घटनापछि प्रहरीले स्कार्पियोको तलासी लिँदा लुकाइछिपाइ राखिएका १३ पोका गाँजा फेला पारेको थियो। बरामद गाँजाको तौल ३९८ किलो रहेको मोरङ प्रहरीका प्रवक्ता डीएसपी मकेन्द्रकुमार मिश्रले जानकारी दिए।
फरार चालकको खोजी भइरहेको र दुवै सवारीसाधन प्रहरी नियन्त्रणमा रहेको मिश्रले बताए।
प्रतिक्रिया
यो पनि पढौँ
यो पनि पढौँ
