भारत-नेपाल सहकार्य: जनकपुरमा प्रविधि र स्टार्टअप सहयोगको गोलमेज बैठक

जनकपुरधाम — भारत र नेपालबीच नयाँ प्रविधि र स्टार्टअप क्षेत्रलाई थप बलियो र प्रभावकारी बनाउने उद्देश्यले आयोजना गरिएको भारत-नेपाल सहकार्य विषयक गोलमेज छलफल सफलतापूर्वक सम्पन्न भएको छ। यो कार्यक्रमले दुई देशका उद्यमीहरू, युवा व्यवसायीहरू र प्रविधि क्षेत्रका प्रतिनिधिहरूलाई नजिक ल्याउने महत्वपूर्ण भूमिका खेल्यो।

महावाणिज्य दूतावास (वीरगञ्ज) र नेपाल यंग इन्टरप्रेनर्स फोरम (एनवाईईएफ) का वीरगञ्ज र जनकपुरधाम शाखाहरूको संयुक्त प्रयासमा पीएचडीसीसीआई भारत–नेपाल सेन्टरद्वारा आयोजित यस कार्यक्रममा ४० भन्दा बढी प्रतिनिधिहरूको सक्रिय सहभागिता रहेको थियो।

कार्यक्रमलाई सम्बोधन गर्दै वीरगञ्जस्थित भारतीय महावाणिज्य दूतावासका महावाणिज्य दुत देवीसहाय मिणाले भारत–नेपालबीचको सहकार्यलाई प्रविधि र स्टार्टअप क्षेत्रमा थप सुदृढ बनाउन यस्ता संवादहरू अत्यन्त आवश्यक भएको बताए। उनले भने, “आर्टिफिसियल इन्टेलिजेन्स (एआई), सूचना प्रविधि र आईटी सक्षम सेवामा भारतले हासिल गरेको अनुभव र क्षमता नेपाली उद्यमीहरूका लागि अत्यन्त लाभदायक हुने विश्वास व्यक्त गरे।”

यस कार्यक्रमले दुवै देशका उद्यमीहरूबीच ज्ञानको आदानप्रदान, साझेदारी र नयाँ लगानीका अवसरहरू खोल्ने अपेक्षा गरिएको छ। भारत-नेपालबीचको आर्थिक र प्राविधिक सहकार्यलाई थप प्रभावकारी बनाउन यस्तो पहलले मधेस प्रदेशलाई स्टार्टअप हबको रूपमा विकास गर्न मद्दत पुग्ने विश्वास गरिएको छ। यो संवादले दुवै देशका उद्यमी, प्रविधि विशेषज्ञ र नीति निर्माताहरूलाई नजिक ल्याएर क्षेत्रीय समृद्धि र आर्थिक विकासमा टेवा पुर्‍याउने अपेक्षा गरिएको छ।

यस प्रकारका छलफल र सहकार्यले भारत र नेपालबीचको मित्रता र आर्थिक सम्बन्धलाई अझ सुदृढ बनाउने दिशामा महत्वपूर्ण कदम बन्ने विश्वास व्यक्त गरिएको छ।