धनुषामा राष्ट्रिय परिचयपत्र सेवा दिन थप दुई वटा काउन्टर सञ्चालन हुने

धनुषा — जिल्लामा राष्ट्रिय परिचयपत्रको सेवा प्रवाहलाई सहज र छिटो बनाउने उद्देश्यले आजदेखि थप दुई वटा काउन्टर सञ्चालनमा ल्याउन लागेको छ। यसअघि दैनिक पाँच वटा काउन्टरबाट बिहानदेखि साँझ ६ बजेसम्म सेवा दिइँदै आएको थियो। सेवाग्राहीको चाप र सुविधा अभावलाई मध्यनजर गर्दै कार्यालयले थप काउन्टर सञ्चालन गर्न लागेको हो।

राष्ट्रिय परिचयपत्रको सेवा पालिकामा नै उपलब्ध गराउने व्यवस्था भएता पनि विभिन्न कारणले गर्दा केही समयका लागि सेवा बन्द भएको थियो। त्यसपछि प्रयोग विहीन रहेका ती उपकरणहरू जिल्ला प्रशासन कार्यालयले आफ्नै मातहत ल्याएर पुनः सञ्चालनमा ल्याएको हो। यसले गर्दा सेवा प्रवाहमा थप सहजता आउने अपेक्षा गरिएको छ।

अहिले पाँच वटा काउन्टरबाट दैनिक करिब ३ सय जना सेवाग्राहीले परिचयपत्रको सेवा लिइरहेका छन्। थप दुई वटा काउन्टर सञ्चालनमा आएपछि सेवाग्राहीको सङ्ख्या अझ बढ्ने र सेवा पाउन सहजता हुने विश्वास गरिएको हो।

राष्ट्रिय परिचयपत्र बनाउनका लागि बिहान ७ बजेदेखि नै सेवाग्राहीहरू कार्यालयको लाममा बसेर आफ्नो नम्बर कुर्न थालेका हुन्छन्। यस परिचयपत्रको आधारमा नै मतदाता परिचयपत्रको विवरण आफैं भर्न सकिने भएकाले यसले सेवा प्रवाहलाई अझ छरितो बनाएको छ।

राष्ट्रिय परिचयपत्रको महत्व भनेको सरकारी कामकाज, वैदेशिक रोजगारी, ज्येष्ठ नागरिकको भत्ता, सामाजिक सुरक्षा र अन्य सेवा सुविधाका लागि आवश्यक पर्ने भएकाले यसको माग दिनप्रतिदिन बढ्दै गएको छ। नेपाली नागरिकले जुनसुकै समयमा राष्ट्रिय परिचयपत्र बनाउन सक्ने व्यवस्था रहेकाले भिड अझ बढ्न थालेको हो।

धनुषा जिल्लामा यस सेवा प्रवाहलाई अझ प्रभावकारी र द्रुत बनाउने उद्देश्यले थप काउन्टर सञ्चालनको तयारी गरिएको हो। यसले सेवाग्राहीलाई सहज र छिटो सेवा उपलब्ध गराउने विश्वास गरिएको छ।