दसैँपछि सुनको मूल्य तोलामा ११ हजार ६०० रुपैयाँले घट्यो, चाँदी पनि सस्तियो

काठमाडौं । दसैँपछिको पहिलो कारोबारमा सुन र चाँदी दुवैको मूल्य घटेको छ। नेपाल सुनचाँदी व्यवसायी महासंघका अनुसार आइतबार सुनको मूल्य प्रतितोला ११ हजार ६०० रुपैयाँले घटेर २ लाख ७८ हजार ५०० रुपैयाँ कायम भएको छ।

गत असोज ३० गते सुनको मूल्य प्रतितोला २ लाख ९० हजार १०० रुपैयाँ थियो। आइतबारको मूल्यअनुसार सुन प्रतिदश ग्राम २ लाख ३८ हजार ७७० रुपैयाँमा कारोबार भएको महासंघले जनाएको छ। दसैँअघि प्रतिदश ग्राम सुनको मूल्य २ लाख ४८ हजार ७१५ रुपैयाँ थियो।

चाँदीको मूल्य पनि घटेको छ। दसैँअघि प्रतितोला ४ हजार १५० रुपैयाँ रहेको चाँदी आइतबार ३ हजार ९५५ रुपैयाँमा कारोबार भएको छ। प्रतिदश ग्राम चाँदीको मूल्य ३ हजार ३९१ रुपैयाँ कायम भएको महासंघले जनाएको छ। दसैँअघि यसको मूल्य प्रतिदश ग्राम ३ हजार ५५८ रुपैयाँ थियो।