धनुषामा लागुऔषध र सामाजिक सञ्जालको दुरुपयोग नियन्त्रण गर्न, गृहमन्त्रीलाई ज्ञापनपत्र

धनुषा । धनुषामा बढ्दो लागुऔषध दुर्व्यसन, सामाजिक सञ्जालको दुरुपयोग र त्यसबाट उत्पन्न अपराध नियन्त्रण गर्न जनसरोकार अभियानले सरकारसँग कडा कदम चाल्न माग गरेको छ।

अभियानले जिल्ला प्रशासन कार्यालय धनुषामार्फत गृहमन्त्रीलाई ज्ञापनपत्र बुझाउँदै जिल्लाको शान्ति–सुरक्षा सुदृढ गर्न र दोषीलाई कानुनी कारबाहीको दायरामा ल्याउन आग्रह गरेको हो।

ज्ञापनपत्रमा धनुषामा लागुऔषधको अवैध कारोबार र प्रयोगकर्ताको सङ्ख्या बढ्दै गएको उल्लेख गर्दै यसले सामाजिक सुरक्षामा चुनौती थपेको जनाइएको छ। अभियानका अनुसार लागुऔषधका कारण चोरी तथा अन्य आपराधिक घटना बढिरहेका छन्। त्यस्तै, सामाजिक सञ्जालमार्फत अभद्र टिप्पणी गर्ने, चरित्रहत्या गर्ने र धार्मिक तथा जातीय सद्भाव खलबल्याउने गतिविधि पनि भइरहेको छ।

अभियानले जनकपुरधाम उपमहानगरपालिका–५ मा अमिन सफीमाथि भएको घटनाको निष्पक्ष छानबिन गर्न माग गरेको छ। घटनाका मुख्य दोषी तथा सहयोगीलाई समेत कानुनी कारबाहीको दायरामा ल्याउनुपर्ने अभियानको भनाइ छ।

अभियानका संयोजक जितेन्द्र महासेठले सामाजिक सञ्जालमा गलत सूचना फैलाउने, अतिरञ्जित टिप्पणी गर्ने र युवालाई आपराधिक गतिविधितर्फ आकर्षित गर्ने समूहलाई नियन्त्रण गर्न राज्य असफल भएको आरोप लगाए। उनले भने, “सामाजिक सञ्जालको प्रयोगलाई मर्यादित बनाउन र सीमापारिबाट हुने लागुऔषधको अवैध ओसारपसार रोक्न सुरक्षा निकायको परिचालन प्रभावकारी हुनुपर्छ।”

ज्ञापनपत्रमा सीमा क्षेत्रबाट भित्रिने प्रतिबन्धित लागुऔषधको आपूर्ति शृङ्खला तोड्न सुरक्षा संयन्त्रलाई थप सक्रिय र प्रभावकारी बनाउन पनि माग गरिएको छ। धार्मिक तथा जातीय सद्भाव कायम राख्न र सामाजिक सञ्जालको दुरुपयोग नियन्त्रण गर्न सरकारले तत्काल ठोस नीति तथा कार्ययोजना ल्याउनुपर्ने अभियानले जनाएको छ।