सांसद न्यौपानेले फोहोर व्यवस्थापनलाई जनस्वास्थ्य र वातावरण संरक्षणको आवश्यक कदम बताए

काठमाडौं — राष्ट्रिय स्वतन्त्र पार्टीका सांसद श्रीराम न्यौपानेले फोहोरमैला व्यवस्थापनलाई केवल सरसफाइको विषय नभइ जनस्वास्थ्य, वातावरण संरक्षण र सभ्य समाज निर्माणसँग जोडिएको गम्भीर विषयका रूपमा लिनुपर्ने बताएका छन्। उनले फोहोरमैला व्यवस्थापन विधेयक, २०८३ माथिको सैद्धान्तिक छलफलमा बोल्दै यस्तो बताएका हुन्।

सांसद न्यौपानेले बढ्दो शहरीकरण र जनसंख्या वृद्धिसँगै फोहोरको मात्रा पनि बढिरहेको भए पनि त्यसअनुसार व्यवस्थापन प्रणाली प्रभावकारी नहुँदा समस्या थपिएको बताए। उनले जथाभावी फालिएको फोहोरले मानव स्वास्थ्य, खानेपानीका स्रोत, वातावरण र प्राकृतिक सम्पदामा नकारात्मक असर पारिरहेको उल्लेख गरे।

उनले स्रोतबाटै फोहोर छुट्याउने, पुनः प्रयोग गर्ने र वैज्ञानिक व्यवस्थापन प्रणालीलाई प्राथमिकता दिनुपर्नेमा जोड दिए।

“हामी नीति निर्माणमा जति सक्रिय छौं, कार्यान्वयनमा त्यति नै प्रभावकारी हुन आवश्यक छ,” सांसद न्यौपानेले भने। उनले विधेयकको कार्यान्वयन र व्यवहारिक परिणामलाई केन्द्रमा राखेर अघि बढ्नुपर्ने सुझाव दिए। प्रस्तावित विधेयकमा पुरस्कार र जरिवानासहित दण्डको व्यवस्था रहेको सकारात्मक पक्ष रहेको उल्लेख गर्दै उनले जरिवाना प्रणालीलाई थप पारदर्शी र प्रभावकारी बनाउनुपर्ने आवश्यकता औंल्याए।

सांसद न्यौपानेले परम्परागत रूपमा फोहोर थुपार्ने प्रणालीबाट बाहिर निस्केर आधुनिक प्रविधिमा आधारित स्यानिटरी ल्याण्डफिल साइट, फोहोर प्रशोधन केन्द्र, कम्पोस्ट प्लान्ट, बायोग्यास प्लान्ट, ऊर्जा उत्पादन, ढल व्यवस्थापन र डिजिटल व्यवस्थापन प्रणालीको विकास गर्नुपर्ने बताए।

उहाँले स्थानीय तहलाई फोहोर सङ्कलन, प्रशोधन, ऊर्जा उत्पादन, ल्याण्डफिल साइट र आवश्यक पूर्वाधार व्यवस्थापनको जिम्मेवारी दिइएको उल्लेख गर्दै सरकार मात्र नभई नागरिक, समुदाय, निजी क्षेत्र र सहकारी सबैको सहकार्य आवश्यक रहेको बताए।

अन्ततः, उनले घरबाटै कुहिने र नकुहिने फोहोर छुट्याउने, सार्वजनिक स्थानमा फोहोर नफाल्ने, प्लास्टिकको प्रयोग घटाउने र सरसफाइलाई संस्कारका रूपमा विकास गर्नुपर्नेमा जोड दिए।