विराटनगरमा आज राधाकृष्ण रथयात्राको भव्य आयोजना

विराटनगर – विराटनगरको पहिचानसँग जोडिएको राधाकृष्ण रथयात्रा आज दिनहुँ भव्य रूपमा आयोजना हुँदैछ। प्रत्येक वर्ष श्रीकृष्ण जन्माष्टमीको भोलिपल्ट निकालिने यस रथयात्राले बजार परिक्रमा गरी भक्तजनहरूलाई भगवान् श्रीकृष्ण र राधाकृष्णको भक्ति अनुभूति गराउँछ।

यस वर्षको रथयात्राको सम्पूर्ण तयारी पूरा भएको राधाकृष्ण मन्दिर व्यवस्थापन समितिका अध्यक्ष कैलाश रेग्मीले जानकारी दिए। दिउँसो ३ बजेबाट सुरु हुने रथयात्रामा नेपाल र भारतबाट तीन लाखभन्दा बढी भक्तजनहरूको सहभागिता हुने अनुमान गरिएको छ। यस पटकको रथयात्रामा डीजे साउन्डको प्रयोगमा प्रतिबन्ध लगाइएको छ, र यसलाई भक्तिपूर्ण तथा परम्परागत झाँकी, भजन–कीर्तन र धार्मिक प्रस्तुतिहरूलाई प्राथमिकता दिइएको छ।

विसं १९८८ मा राधाकृष्ण मन्दिरको स्थापना भएपछि खट यात्रा सुरु भएको हो। विक्रम संवत २०२५ बाट यसलाई भव्य रूपमा आयोजना गर्न थालिएको रथयात्रा यस पटक ५९ औं पटक आयोजना भइरहेको छ। यससँगै खट यात्रा पनि ९५ औं पटक हुँदैछ।

विराटनगरको पानीटङ्की चोकबाट सुरु हुने रथयात्रा तीनपैनी चोक, गोल्छा चोक, मेनरोड, ट्राफिक चोक, रोडशेष चोक र महेन्द्र चोक हुँदै बरगाछी, दुर्गा चोक र अन्ततः पुनः राधाकृष्ण मन्दिरमा पुग्नेछ। करिब ८ किलोमिटर दूरीको यस यात्रामा ४४ स्थानमा विश्रामको व्यवस्था गरिएको छ।

रथयात्राको क्रममा भेटीबापत संकलित रकम भोटेकोशी बाढीपीडितहरूको राहत र पुनर्स्थापनाका कार्यहरूमा प्रयोग गरिनेछ। यस प्रकारको धार्मिक र सांस्कृतिक कार्यक्रमले भक्तजनहरूको मनोबल बढाउँदै आएको छ भने स्थानीय पर्यटन र संस्कृतिको प्रवर्द्धनमा समेत मद्दत पुर्‍याउँदै आएको छ।