प्रधानमन्त्री कार्की र मधेस प्रदेश प्रमुख सुरेन्द्र लाभबीच भेटवार्ता

काठमाडौँ – प्रधानमन्त्री सुशीला कार्की र मधेस प्रदेश प्रमुख सुरेन्द्र लाभबीच मंगलबार भेटवार्ता भएको छ। प्रधानमन्त्री निवास बालुवाटारमा भएको यस भेटवार्तामा वर्तमान राजनीतिक र सामाजिक परिस्थितिको समिक्षा गरी शान्ति, सद्भाव र सहिष्णुता कायम गर्नका लागि गरिएको प्रयासहरुको मूल्याङ्कन गरिएको प्रधानमन्त्रीको सचिवालयले जनाएको छ।

भेटवार्तामा, देश आगामी निर्वाचनको महत्वपूर्ण चरणतर्फ अघि बढिरहेको सन्दर्भमा सम्भावित चुनौतीहरूलाई ध्यानमा राख्दै सबै राज्य संयन्त्रहरूलाई परिचालन गरी अनुकूल वातावरण निर्माण गर्न आवश्यक रहेको विषयमा छलफल भएको थियो। सहभागीहरूले यस क्रममा सबै पक्षको साझेदारी र सहकार्य आवश्यक भएकोमा जोड दिएका थिए।

प्रदेश प्रमुख सुरेन्द्र लाभले समाजका विभिन्न तह र तप्काबीच सन्तुलित र अभिभावकीय भूमिका निर्वाह गर्दै सामाजिक समरसता कायम गर्न भूमिका निर्वाह गरिरहेको उल्लेख गरे। प्रधानमन्त्री सुशीला कार्कीले यसमा सबैको साथ र सहयोग अपेक्षा गरिएको स्पष्ट पारिन्।

उल्लेखनीय छ, यस भेटवार्ताले आगामी राजनीतिक गतिविधि र सामाजिक समरसताको संरक्षणमा महत्वपूर्ण योगदान दिने अपेक्षा गरिएको छ।